Ssaabasajja Kabaka Ronald Muwenda Mutebi II asiimye okulabikako eri Obuganda ku lwokutaano lwa Wiiki eno ng’Obuganda bukuza olunaku lwa Bulungibwansi ne Gavumenti ez’ebitundu mu Lubiri e Mengo.
Bino birangiriddwa Katikkiro Charles Peter Mayiga bwabadde atongoza akakiiko akateesiteesi ak’emikolo gya Bulungibwansi ne Gavumenti ez’ebitundu akakulemberwa Oweek. Hajjat Mariam Nkalubo Mayanja. Mu ngeri yeemu Katikkiro alangiridde eSsaza Kyaddondo ng’eryasukkuluma ku malala mu kutuukiriza obuvunaanyizibwa wamu n’okussaawo pulojekiti ez’enkulaakulana mu bitundu byabwe.
Katikkiro asabye abaami okukola Bulungibwansi akyuusa embeera z’Abantu naddala mu by’obulamu, mu byenjigiriza, n’ebyenkulaakulana.