Saamanya nti Yasin anvuga omulundi ogusembayo – Zaake

Nga 12 August, 2018 nali Mityana Municipality nga nsisinkana ba Ssentebe ba LC1. Munanku ntono emabega twali tusisinkanyeemu na People Power okuwagira Hon. Kasiano Wadri mu kulonda kwa Arua Municipality era nga Hon Kyagulanyi Robert aka HE Bobi Wine n’abalala baali batuuse dda mu Arua. nali wakubeyungako enkeera ku makya nga 13 August, 2018 wabula oluvannyuma lw’olukiiko ne ba Ssentebe ba LC1 ebirowoozo byange byadda nnyo ku nsonga za Arua Municipality era nensalawo okwolekera Arua wabula nga sirina ddereeva antwala mu Arua kuba Ddereeva wange yalina okutwala n’okukima abaana ku ssomero.

Nakubira Bobi Wine ndabe oba yali asobola okunfunira Ddereeva bwatyo nakubira Yasin Kawuma kati omugenzi nanvuga okuntuusa mu Arua. Twasimbula e Kawempe ssaawa ssatu ez’ekiro era wezawerera ssaawa kumi ez’okumakya nga tuli mu Arua. Nga musanyufu nnyo era nga mwetegefu okukola emirimu gye Yasin yanyumiza ku family ye, ebirowoozo byeyali alina nga musanyuffu nga tayagala ffujjo. Kyannaku nnyo nti Eggwanga lyasalawo okukomya obulamu bwe mungeri nga eyo. Mubulumi obungi saamanya nti omulundi gwenali ntambudde naye gwegwali gusembayo. Saafuna mukisa guziika mukwano gwaffe. Omwoyo ggwe Omukama Katondo aguwumuze mirembe.

Mu ngeri y’emu, ntuusa okusaasira kwange eri ab’ennyumba ya Yasin, nebanaffe abalala betwamanya n’abalala betutamanya abafiira ku mulimu guno ogw’okunnunula Eggwanga. E Mityana abalala bangi battibwa Poliisi ya Yuganda bwebaali bekalakaasa olw’okutusiba. Kino kirina okukoma, Abasirikale abo abatta abantu balina okuvunaanibwa era mu kino Bannamateeka baffe batandise dda okugoberera ensonga zino kuba aba Family zaabwe betaaga obwenkanya.