Pulezidenti Yoweri Kaguta Museveni avuddeyo nawakanya ne ssekuwakanya ekyokuwa ettendekero lya Idi Amin Institute nga lino lyakutumbula emirimu egyakolebwa eyaliko Pulezidenti wa Uganda Field Marshal Idi Amin Dada Oumee nga okusaba kuno kwakoleddwa eyaliko Omubaka wa Obongi County Munnakibiina kya Forum for Democratic Change Hon. Fungaroo Kaps Hassan.
Pulezidenti Museveni agamba nti Gavumenti ya Amin teyaliiwo mu mateeka era yali emenya ssemateeka okusinziira ku ngeri gyeyaggyamu mu buyinza.
Ono alagidde Mukyala we nga ye Minisita avunaanyizibwa ku by’enjigiriza n’emizannyo Hon. Janet Kataaha Museveni obutakiriza ttendekero lino kuwandiisibwa nga agamba nti Amin yatta abantu bangi nnyo okugeza abasirikale aba Lango n’Abacholi nga bano yabattira Mbarara, abasibe beyattira mu kkomera e Mutukula, okutta Ben Kiwanuka, Bantaringaya ne Mukyala we n’abalala.
Ono ayongerako nti Amin yasuula ebyenfuna by’eggwanga bweyakola okusalawo nga talowoozezza nagoba Abayindi abadduka nebagaggawaza Canada ne Bungereza.
Mu bbaluwa ye agamba nti tekisobola kukirizibwa kuwa layisinsi ttendekero ligenda kusomesa mirimu gyakolebwa Idi Amin, nti era kimala olwokuba nti Bannayuganda basonyiwa banne ba Amin abakyali abalamu, ebyo ebyafaayo bye byo ka byerabirwe.
Leave a Reply
You must be logged in to post a comment.