Poliisi etubidde n’abaana 72 n’abakyala 7

Poliisi etubidde n’abaana 72 wamu n’abakyala 7 beyanunula mukikwekweto kyeyakola okukwata abateberezebwa okwenyigira mu kutta Susan Magara okuva mu muzigiti gwa Usafi emyezi ebiri egiyise.

Bano bebamu ku bantu e 118 Poliisi beyanunula okuva mu muzigiti ogw’amabaati nebateekebwa wansi w’obukuumi e Kibuli ku kitebe kya CIID.

Abamu ku baana n’abakyala bbo bakimwa bazadde baabwe n’abenganda zaabwe abazuulibwa nti tebalina kakwate ku bikolwa ebyali mu muzigiti guno.

Omwogezi wa Poliisi Emirian Kayima agamba nti Poliisi ekyalemedde abaana n’abakyala bano kuba teboogera gybaava wadde amannya g’abazadde baabwe. N’ekirala nti abasinga ku baana bano batto nnyo ate abalala tebasobola kumanya gyebaava.