Ttiimu ya Uganda Police Force eya K-9 e Mityana yayitiddwa oluvanyuma lw’omutuuze omu Kayima Madi omutuuze ku kyalo Kitaliza, Kamuseenene Parish mu Kiganda Sub-county okwekubira enduulu ku Poliisi y’e Kiganda nga bwewaliwo omuntu eyabbye emmwaanyi ze ku musiri.
Poliisi yatutte embwa yaayo enkongalusu mu musiri webabbye emmwaanyi era bwetyo nebakulembera okubatwala olugendo nga lwa kiromita 1 mu nnyumba ya Kanyikera Raphael ku kyalo Bugayo, era bwebayazizza ennyumba ye nebasangamu emmwaanyi ezakanogwa. Raphael yategeezezza nti emmwaanyi zino sizize nti waliwo eyazimuleetedde kuba yakitegeddeko nti ayagala emmwaanyi wabula nagaana okumwogera.
Era mu ngeri yemu ttiimu ya Poliisi eya K-9 mu Disitulikiti y’e Bushenyi yayitiddwa bukubirire okuyamba okuzuula eyabbye nnamba z’emotoka era embwa yabatutte ewa Agaba Alvin, ono nga yabadde yakayimbulwa ku misango gyegimu egyokubba ennamba ez’emotoka.
Agaba bweyalabye Poliisi neyeyokya ekibira era nga kati Poliisi emuyigga.