Uganda Police Force e Mbale ezudde emmundu egambibwa okuba nga ebadde ekozesebwa abazigu mu kutigomya abantu n`okubabba, emmundu eno yasuuliddwa mu mugga Namatala ku luguudo oluva e Mbale okudda e Soroti, abatuuze abakeera okwoza piki piki nemotoka mu mugga guno bebaalabye emmundu eno ne bakubira Poliisi nayo nejja okulaba ogubadde.
Akulira ebikwekweto ku Poliisi e Mbale ASP Arafat Kato yategeezezza nti emmundu eyazuuliddwa kika kya AK47 naye yabadde teriiko magaziini nga kiteberezebwa okuba nga yasuuliddwaawo abazigu mu budde bwe kiro nga erabika ebadde ekozesebwa mu bumenyi bwamateeka nga kirabika yasuuliddwa lwakutya kubalondoola.
Omwogezi wa Poliisi mu bitundu bya Elgon Rogers Tayitika yagambye nti Poliisi ekyagenda mu maaso n`okunoonyereza engeri emmundu gyeyasuliddwaawo, akazito Poliisi ketadde ku babbi n’abamenyi b’amateeka kirabika kye kyavuddeko ababbi okusuula emmundu ngebalemeredde.
Bya; Waaki Moses