Poliisi e Masaka ekutte ababba ennamba
Ekitongole kya Poliisi ekirwanyisa obubbi bw’emmundu ekya Flying Squad enkya yaleero kikutte abasajja 4 ababadde bagufudde omugano nga ogw’enswa okubba ennamba za motoka nebalekawo ennamba z’essimu zaabwe nga baagala banannyini motoka babawe ssente.
Abakwatiddwa kuliko; Bbale Kitasa 27, omutuuze w’e Kyotera, Kamya Charles 36, Ssegawa Javira 48 omutuuze w’e Rakai ne Habasa Charles 25 ow’e Kyotera.
Bano bagiddwa mu bifo eby’enjawulo gyebabadde bekukumye oluvannyuma lw’okukitegeerako nti banoonyezebwa era nebasangibwa ne nnamba za motoka.
