Omubaka wa Kitagwenda County mu Lukiiko olukulu olw’eggwanga Abas Mugisha Agaba atemeza mabega wamitayimbwa mu kadduukulu ka Kkooti ya Buganda Road nga alindirira okugasimbagana n’omulamuzi ku misango mukaaga egimuvunaanibwa oluvannyuma lw’okuggya ssente obukadde 110 ku Munnakibiina kya NRM George Patrick Kasajja nga ono yali yesimbyeewo mu Bulamogi Northwest nga amusuubizza nti yali wakukola nga Munnamateeka we kyatatuukirizza.

Abatuuze ku myalo egisangibwa e Lukonda mu Disitulikiti y’e Buikwe bavudde mu mbeera nebategeeza nga bwebagenda okuyigga ggoonya eyalidde munaabwe Erifaazi Mwanda nemulya singa ab’ekitongole ekikuuma ebisolo mu Ggwanga ekya Uganda Wildlife Authority tebavaayo nebagikwata.
Kansala Daudi Nambaale yagambye nti Elifaazi yabadde ava mu nnyanja gyeyasuze ng’avuba wabula yabadde akyali mu mazzi nga tanagoba ggoonya nemubaka okujja kulyato ne mulya. Abatuuze bekozeemu omulimu okunoonya ebisigalira wabula nebibabula. Bano bagamba nti Ggoonya eno eridde abantu abawerako naye mpaawo kikolebwa.

Abakulembeze b’ekibiina ekitaba bannamawulire mu ggwanga bakyaliddeko Katikkiro ne bamwanjulira enteekateeka z’obukulembeze bwabwe . Bakulembeddwamu Ssentebe Kazibwe Bashir. Mu kwogerako gyebali, Katikkiro abasabye okuwandiika amawulire mu butuufu bwago omutali kyekubiira.

Ssaababazi w’ebitabo bya gavumenti (Auditor General) John Muwanga yategeezezza nga akakiiko k’ebyettaka aka Uganda Land Commission bwekazimuula okuwabula obutagula ttaka lye Mutungo okuva ku Dr. Buwule Kasasa.
Ono yagambye nti wadde nga ettaka lino lyasasulwa naye mpaawo kubalirira kwasooka kukolebwa okumanya omuwendo gw’ettaka lino okuva eri Gavumenti Valuer era nga kino kyaleetera Gavumenti okufiirwa ensimbi.

Poliisi yokumulirwano e Kenya yakutte abawala Bannayuganda 11 nga bali wansi w’emyaka 18 nga bagenda Nairobi – Kenya. Bano bagamba nti baabadde batwalibwa kukola bwa yaaya naye ng’empapula eziboogerako tezitegeerekeka.
RDC w’e Busia Mike Chris Okiria agamba nti bano baabadde bava mu bitundu by’e Moroto, Matanyi, Rwengechor ne Yiriyiri era nga babadde bagenze ne banaabwe babiri ababasooka okugendayo nebakola ssente.

Poliisi eriko abavubuka abekazaako erya Jobless Brotherhood bekutte neggalira nga kiddiridde bano okwekalakasizza mu Kampala. Abavubuka bano bagamba nti ekitongole ekitwala Kampala ekya Kampala Capital City Authority – KCCA kyakwata omutembeeyi ategerekese nga ye Juma Akankwasa naye nga naguno gujwa taddangamu kulabibwaako.

Poliisi e Kawempe ekutte abantu 4 era n’ezuula emotoka ekika kya Premio nnamba UAK 672X nga njeru nga kati ekuumirwa ku Poliisi e Kawempe. Kigambibwa nti emotoka eno yabadde etundibwa olunaku lw’eggulo era Poliisi nekwata ababbi 4.
Ababbi bakkirizza nti babadde babba emotoka okuva mu bitundu eby’enjawulo omuli Mukono, Kayunga ne Buikwe.

Omulamuzi omukulu owa Kkooti evunaana abakennuzi wamu nabali b’enguzi Pamela Lamunu avuddeyo nategeeza nga bwagenda okuyisa ekibbaluwa kibankutumya ekikwata Omubaka wa Kawempe South Mubarack Munyagwa Sserunga olwokwebulankanya emirundi egiwerako nga talabikako mu kkooti okwewozaako ku misango gy’okulya enguzi egimuvunaanibwa.

Munyagwa avunaanibwa omusango gw’okufuna ensimbi obukadde 100 okuva Francis Kakumba nga amusuubizza okufunira mutabani we Muyanja Isaac ekifo ku kakiiko ka Kampala Capital City Authority Land Board nga akiikirira Kawempe. Ono yabadde asuubirwa mu kkooti olunaku lwaleero wabula munnamateeka we Chrysostom Katumba yalabiseeko nategeeza kkooti nga omuntu we bwatali mu Ggwanga.

Ssaabawandiisi wa Forum for Democratic Change avuddeyo n’awandiikira Nampala w’oludda oluvuganya mu Lukiiko olukulu olw’eggwanga Ibrahim Ssemujju Nganda nga amutegeeza nga bwebalonze Omubaka wa Makindye East Ibrahim Kasozi ng’omumyuka wa Ssentebe w’akakiiko akalondoola emirimu gy’ebitongole bya Gavumenti aka Committee on Commissions, Statutory Authorities and State Enterprises (COSASE).
Ono azze mu kifo kya Moses Kasibante eyali asoose okulondebwa wabula omukubiriza w’olukiiko olukulu Rebecca Alitwala Kadaga namulonda ku Kakiiko akalala.