Charles Rwomushana; “Ekigenda mu maaso mu Omoro County si kalulu wabula kikwekweto. Kigenda kuggwa nga Akakiiko k’ebyokulonda aketengeredde (Independent Electoral Commission Uganda) kalangiridde ebivudde mu kulonda byebayinza okuba bafunye dda, singa banagenda mu Kkooti, ensala nayo bagirina.”

Omwogezi w’eggye ly’egggwanga erya UPDF Brig. Gen. Felix Kulayigye avuddeyo nategeeza nga bwebakutte Asiimwe Andrew Mark ng’ono yaggulawo omukutu gwa Facebook mu linnya lya Gen. Salim Saleh. Kigambibwa nti ono abadde ajja ssente ku Bannayuganda ngabasuubiza emirimu e Canada. Ono wakusimbibwa mu Kkooti avunaanibwe.

Pulezidenti Yoweri Kaguta Museveni bweyabadde ayogerako eri omukutu gw’amawulire ogwa TRT bweyabuuziddwa ku nsonga ya mutabani we era omuduumizi w’eggye lya UPDF eryokuttaka Lt. Gen. Muhoozi Kainerugaba okulaga obwagazi bw’okwesimbawo ku bwa Pulezidenti mu 2026, yavuddeyo nasaba Bannayuganda nabo abagoberera ensonga z’ebyobufuzi okukomya okufumiitiriza ennyo ku kabaga ka mazaalibwa kuba kaali kabaga bubaga; “Kaali kabaga kamazaalibwa. Abantu baali baagala era nebajja ogutali musango. Naye bajja lwakabaga kamazaalibwa kyokka. Bannayuganda balina eddembe okulondawo ani gwebaagala abakulembere era eggwanga lya Bannayuganda bonna so ssi Famire yange nga Museveni.”

Omubaka wa Palamenti akiikirira Essaza ly’e Bbaale Munnakibiina kya National Unity Platform – NUP Hon Charles Tebandeke asabye Abakulembeze ku mitendera egy’enjawulo okuvangayo bayambeko mukulondoola pulojekiti za Gavumenti zeeba ereese mu bitundu byabwe baleme ate kulindiriranga Bababka kuzirondoola. Hon. Tebandeke okwogera bino abadde alambuula omulimu gw’okulima oluguudo oluva e Kabaku-Bbaale okutuuka e Jiiira nga luno lw’e lugenda okuyunga ku lutindo oluli mukuzimbwa ku mugga Ssezibwa lugatte Disitulikiti y’e Kayunga ku y’e Nakasongola.

Kitalo!

Abantu 7 bakakasiddwa okuba nga bafiiridde mu kabenje n’abalala nebabuuka n’ebisago oluvanyuma lw’emotoka ekika kya FUSO nnamba UAX 226U okuggwa mu Disitulikiti y’e Bukomansimbi ettuntu lyaleero.

Okusinziira ku berabiddeko nagaabwe bagamba nti Ddereeva wa Fuso abadde avugisa kimama ngebadde etisse abantu nga 20 nga babadde bava mu Nnyendo mu Disitulikiti y’e Masaka nemulemerera okukkakana nga atomedde ebyuuma ku kyalo Kanoni, Butenga Sub County mu Disitulikiti y’e Bukomansimbi.

Kigambibwa nti bano babadde bagenda mu katale e Bukomansimbi.

Abamu ku bantu ababadde ku FUSO eno bakutuseeko emikono ate abalala amagulu era baddusiddwa mu Ddwaliro lya Villa Maria okufuna obujanjabi.

Minisita avunaanyizibwa ku butebenkevu Maj. Gen Jim Katugugu Muhwezi wamu ne Minisita w’ebyokwerinda Jacob Oboth Oboth bavuddeyo nebaanukula Akakiiko ka Palamenti aka Parliamentary Committee on Government Assurances akakulirwa Omubaka Munnakibiina kya National Unity Platform – NUP Betty Nambooze Bakireke akayise omumyuuka w’omuduumizi w’eggye lya UPDF eryokuttaka Lt. Gen. Muhoozi Kainerugaba alabikeko gyekali, bano bagamba nti balina obusobozi obwanukula ebibuuzo byonna ku lwomusirikale waabwe.

Abawagizi b’omuduumizi w’eggye lya UPDF eryokuttaka Lt. Gen. Muhoozi Kainerugaba bakedde kuyisa bivvulu mu kibuga Kampala wamu n’okuyonja ebifo eby’enjawulo. Bano begatiddwako Minisita avunaanyizibwa ku nsonga za Kampala, Hon. Hajjati Minsa Kabanda, Minisita Hon. Ogwang, Eyaliko Minisita Nakiwala Kiyingi ne Ssentebe Salim Uhuru. Byonna byawomeddwamu omutwe Chairman Micheal Nuwagira aka Toyota.