Ssentebe w’akakiiko ka Palamenti aka Public Accounts Committee Munnakibiina kya National Unity Platform Hon. Muwanga Kivumbi alagidde CID okukwata Doreen Katusiime omuwandiisi omukulu mu Minisitule y’ebyobulambuzi okuva mu maka ge. Kino kidiridde ono okuyitibwa enfunda eziwera ngatalabikako kunyonyola ku bibuuzo ebyeyolekera mu bitabo bya Minisitule. Ono abadde asindika abali wansi we mu Minisitule okujja mu kakiiko nti era yasaba okugenda okuwummula bwewaali wabulayo enaku ntono alabikeko mu Kakiiko.
Kivumbi agamba nti bakooye okuboononera obudde era tajja kukiguminkiriza kuba akimanyi bakikola mu bugenderevu.

Abasomesa okuva mu masomero ga Pulayimale agaakola obubi mu bigezo bya PLE agasoba mu 40 okuva mu Disitulikiti y’e Nakaseke batuyanye nga bwezikala oluvannyuma lwa Ssentebe wa Disitulikiti Mw. Koomu Ignatius Kiwanuka okubawa ebigezo mu ssomo buli omu lyasomesa babituule nekigendererwa ekyokutumbula omutindo gw’ebyenjigiriza. Koomu agamba nti kino akikoze nekigendererwa kyokulaba nti batumbula ebyenjigiriza mu Disitulikiti oluvannyuma lwabayizi okukola obubi ennyo mu bigezo bya PLE. Ono ayongerako nti ayagala okulaba nti Abasomesa baalina bali ku mutendera ogusobozesa abayizi okuvuganya mu Ggwanga lyonna.

Bannamateeka b’Omubaka wa Mityana Municipality Munnakibiina kya National Unity Platform MP Zaake Francis Butebi banenyezza abakugu okuva ku Ssetendekero wa Makerere mu kitongole ky’ebyennimi olwokuvvuunula obubi ebigambo ebyayogerwa Omubaka Zaake mu katambi okubizza mu Lungereza.
Kino kyaddiridde Dr. Medard Ssentanda okusaba ekiwandiiko ekyasooka okuwebwayo ekyali kyoleka ebigambo ebyayogerwa Hon. Zaake okuva mu katambi akaweebwayo Omubaka omukyala owa Disitulikiti y’e Rakai Juliet Kinyamatama byagamba nti byali bimutyoboola ng’omukyala kisazibwemu.
Dr. Ssentanda, nga Senior Lecturer mu Department of African Languages mu Makerere University, yakirizza nti yakola ensobi bweyavvuunula ebigambo ebyali mu katambi nawandiika ‘selling her body’ mu kifo kya ‘selling herself’. Bannamateeka ba Hon. Zaake bakizudde nti okuvvuunula okwakolebwa kwayoleka bwa malaaya ensobi Dr. Ssentanda gyeyakirizza nategeeza nti kino kyava ku budde obutono obwamuweebwa okuvvuunula ebigambo ebyali mu katambi nga akatambi kamuweebwa ssaawa kumi nabbiri ezolweggulo nga baali babyetaaga ssaawa ssatu ezokumakya enkeera.
Munnamateeka Erias Lukwago yasabye Dr. Ssentanda annyonyole; “Okiriza nti wakola ensobi bwewavvuunula nti ‘she is always there at Parliament as if selling her body, kwekyuusa nogamba nti ‘as if she is selling herself?’ Ggwe avunaanyizibwa ku kukakasa omutindo ate nokola ensobi ngeyo? Erinnya Kinyamatama waliwulira wa mu katambi, kuba oli mu katambi ayogera ku Kyamatama?”

Omubaka akiikirira Busiro East Munnakibiina kya National Unity Platform Hon. Medard Lubega Sseggona yavuddeyo nateeka ekitongole ekivunaanyizibwa ku nguudo mu Ggwanga ekya Uganda National Roads Authority UNRA kinnyonyole lwaki basiba nguudo 2 ku Entebe Expressway buli Pulezidenti Yoweri Kaguta Museveni lwaba akozesa oluguudo luno ssaako nezo eziyita waggula kyagamba nti kitaataganya abantu abalala abakozesa oluguudo luno ate nga balusasulira so nga ye Pulezidenti talusasulira nga alukozesa.
Mukwanukula Executive Director wa UNRA Allen Kagina ategeezezza nti basobola okukolera awamu nabebyokwerinda okwanukula kino nti wabula kino kyabulijjo ekyaba SFC okugenda mu kifo gyaba agenda okuyita nga tanatuuka okumukolera ekkubo. Ono ayongeddeko nti ebiubuuzo ebimu tasobola kubyanukula nti wabula bakola ku kyobudde bwebamala nga basibye enguudo zino bukendeereko.

Waliwo Ababaka Bannakibiina kya National Resistance Movement – NRM abamu abasazeewo okwegatta ku Babaka b’Oludda oluvuganya, okusaba Sipiika okuyita Ababaka okuvaayo mu luwummula batuule nabakulembera Palamenti okusobola okwekeneenya ensonga y’obuli bw’enguzi wamu n’okukozesa obubi offiisi ebibunye omutimbagano. Omubaka akiikirira Lwemiyaga County Theodore Ssekikubo ategeezezza nti bangi tebakyasobola kutambula ku nguudo za Kampala babeera bekwese nga nebwebaba batambudde balina okukusibwa. Ono agamba nti kati n’okuyitibwa Omubaka wa Palamenti kiswaza, kuba tewali avaayo kwanukula. Ono agamba nti ekifaananyi kya Palamenti eri Bannayuganda kyayonoonese.

Omubaka omukyala akiikirira Disitulikiti y’e Kampala Munnakibiina kya National Unity Platform Hon. Shamim Malende enkya yaleero akedde mu katale Kaabaliko obulemu akalinaanye ppaaka empya mu Kampala okwengeramu nabo ku mbeera nga bwebayisa. Bano bamulombojjedde embeera gyebayisibwamu naddala abakwasisa amateeka mu Kitongole kya Kampala Capital City Authority – KCCA ababatulugunya naddala abakyala. Bano abawadde ebyokusibulukukirako omuli emmere, ebikozesebwa mu offiisi omuli entebe wamu ne aprons. Bano era bagamba nti omusolo ogubinikibwa ku byamaguzi mungi nnyo ekibalemesa okufuna amagoba ku byebasuubula.