Pulezidenti Museveni avumiridde abantu abawaayo amawulire agoobulimba eri Police okufuna ssente mu ngeri eyoolukujjukujju ku butabanguko obwaliwo e Kasese gyebuvuddeko.

Omukulembeze w’eggwanga agamba nti guno guba musango gwennyini okuwa ekitongole kya Gavumenti amawulire agoobulimba, n’agamba nti baalibadde baleka Police neekola omulimu gwayo bulungi.

Bino abituuseeko bwabadde nga asisinkanye abamu ku bakulembeze okuva mu Disitulikiti ey’e Kasese, nga bakulembeddwamu omubaka mu Palamenti owa Disitulikiti y’ e Kasese era nga yaakulira abooludda oluvuganya Gavumenti, Winnifred Kiiza.

Waliwo ebbujje lya myezi ena lisirikkidde mu nnabbambula w’omuliro akutte ennyumba mweribadde lyebase ku kyalo Jinja mu Ggombolola y’e Maanyi ekisangibwa mu Disitulikiti y’e Mityana. 

Naiga Hawa abadde alekeddwa nnyina mu nnyumba nga akasubbaawa kaaka, kakutte akatimba mbu omuliro negulyoka gubuna obuliri bwona  wamu n’ekisenge.

Ye Maama w’omwana Kyomuhendo Betty abaddeko waalaze, agenze okudda ng’omuliro gukutte ennyumba yonna era nnassaako enduulu era abatuuze bagenze kuzikiza omuliro okutuuka ku mwana nga zeembuyaga ezikaza engoye .

Police y’e Maanyi eyise ginnewaayo ey’e Mityana okuggyawo omulambo ate ne maama w’omwana n’atwalibwa ku Police abitebye.

Lino litusakiddwa Joseph Balikuddembe .

Eggye lya Yuganda livuddeyo nerirunngamya nti teriyisanga lugaayu mu nsala ya kkooti enkulu mu musango oguvunaanibwa munnamagye Cpl. Majibu Ssebyara mu kkoti y’ekinnamagye ku kulemererwa okukuuma ebintu by’amagye ebikozesebwa mu lutalo ekikontana n’amateeka agabafuga.

N’olwekyo UPDF egamba nti baafuna ensala ya kkooti enkulu nga eyimiriza kkooti yeekinnamagye okuwulira omusango guno kubanga waaliwo okutulugunyizibwa kw’ avunaanwa okuva eri abo abaali bakola okunoonyereza. Nabwekityo kkooti y’ekinnamagye n’eteeka ekitiibwa mu nsalawo ya kkooti enkulu era nayo neeyimiriza okuwulira omusango guno.

UPDF eyongerako nti mu kiseera kkooti enkulu weyaweera ensala yaayo, Ssebyara yalina emisango emirala nga ye egikwata ku by’okwerinda gyeyali awerennemba nagyo egikontana n’etteeka ly’amagye section 130 .

Mu kiwandiiko ekiteereddwako omukono omwogezi wa Magye ga Yuganda,  Lt Col.Paddy Ankunda , webasinzidde okusaba abantu okubeera abagumiikiriza ku nsonga zino , obutavaayo nabigambo bino na biri kisobozese ab’amateeka okutambuza ensonga zino obulungi.

Ssentebe wa Disitulikiti y’e Wakiso, Matia Lwanga Bwanika agamba nti Disitulikiti teggya kuliyirira muntu yenna naddala nga ettaka lye lirina engeri gyelyasengebwako mu kiseera ekyokuzimba n’okukola enguudo mu bitundu eby’enjawulo ebya Disitulikiti eno. 

Kino kiddiridde abantu abawerako gamba ng’abali mu bitundu by’e Kyebando, Nansana, Bujuuko n’awalala nga bano baddira ettaka lyabwe ate abantu abamu nebagenda okulyewangamyako mu biseera ate okukola omulimu guno wegutandikidde.

Mukwogerezeganyaamu naffe, Bwanika agamba nti ku busente obutono bwebafuna okukola enguudo zino tekuliiko zaakuliyirira bantu.

Wabula Bwanika awadde amagezi nti abantu abamu  abamala geewaanngamya bwebatyo , enkola eno eyinza obutakkirizika mu nkola yenguudo era agamba nti enguudo eziwerako zigenda kukolebwa n’omwaka ogujja .

Wabaddewo ekikwekweto ekikoleddwa ab’ebitongole ebikessi enkya ya leero ku Kitebe ky’abatabbuliiki e Nakasero nga basinziira ku mawulire gebaafunye mu bamu ku basibe abavunaanibwa ogw’okutemula abayisiraamu. 

Mu kikwekweto kino bayodde abantu 18, basanzeemu zi Magazine z’amasasi ssatu, n’amasasi 128 wamu n’ekiwandiiko .

Abakwatiddwa mulimu; Isabirye Abdalah, Ssesanga Derrick, Ssenyonga Muhammad, Kabwama Juma, Hassan Musa, Abdalah Aman, Ssekamatte Muzamiru, Ssevuma Hasqnn, Ssebandeke Muzamiru, Ssekandi Musa, Ashraf Mawanda, Lubega Abdalah , Mukasa Hassan, Muwanga Umar, Opendi Sam, Owere John, Ssemanda Musa .

Omwogezi wa Police mu kampala n’emiriraano, Emilian Kayima agamba nti ekikwekweto kino kikoleddwa wakati w’essaawa kkuminabbiri  n’emu ezookumakya so ssi kiro nga abalala bwebabadde babibungeesa .  Agamba nti mu birala ebiggyiddwayo mubaddemu emitego, obusaale  n’ebyambe 2.

Police e Mubende ekyali ku  muyiggo gw’ emmundu eyabbibwa ku muserikale waayo gyebagamba nti yandyeyambisibwa mu bikolwa by’ obumenyi bw’amateeka naddala mu biseera bino eby’ennaku enkulu.

Byaruhanga Patrick, nga ye DPC wa Mubende atutegeezezza nti emmundu eyabbibwa ya kika kya ”Pistol” era nga abaagibba baamenya nnyumba ya muserikale esangibwa mu Kirungi gyasula ekiri mu Municipaali y’e Mubende nebakuuliita nayo.

Agasseeko nti mu kiseera kino, bakola ebikwekweto ebyenjawulo okuzuula emmundu eno wa weeri naye nga tebanagifuna, bwatyo kwekusaba Banamubende bonna abalina amawulire agakwata ku mmundu eno okutemya ku Police.

Annyonnyodde nti emmundu yabbibwa ku mu Poliisi avunaanyizibwa ku kulondoola eddagala era nga mu kiseera weyabbibwa yali agenze ku dduuka olwo bantu abatannategeerekeka nebamenya ennyumba nebakuuliita n’ebintu omwali n’emmundu.

Mu kiseera kino, abantu abasoba  mu 80 be baakakwatibwa Police e Mubende okusobola okugiyambako okunoonyereza.

Police e Lira egombyemu obwala abantu 5 nga ba mu Famile emu abagambibwa okwekobaana nebatta Kitaabwe.

Ongom David omwogezi wa Police mu bitundu by’e Kyoga atubuulidde nti abaana bano nga bali ne nnyaabwe olwamalirizza okumutta nebakweka omulambo mu Ttanka ya kazambi.

Ssaabasumba w’essaza ekkulu erya Kampala, Dr. Cyprian Kizito Lwanga asabye Kampuni eziyiiya zi yiiyeeyo ebintu ebirala ebikozesebwa okufumba nga bya sente ntono, kiyambe abantu okukomya okutema emiti okwokya amanda oba enku ezokufumbisa n’embaawo,  ekyonoonye obutonde bwensi n’okumalawo ebibira.

Ssaabasumba okusaba kuno akukoledde mu Misa ya Ssekukkulu ku Lutikko e Lubaga.

Ye omumyuka wa Pulezidenti, Edward Kiwanuka Sekandi asinzidde mu kusaba kwekumu e Lubaga n’asaba bannayuganda okukuuma obutonde bwensi anti ebibira batitemye ekivuddeko ekyeya mu bitundu by’eggwanga. Ssekandi ayongerako anti abantu beekuulira kabazzi kkugulu bweboonoona obutonde bwensi.

Ssaabalabirizi wa Kanisa ya Uganda, Bishop Stanley Ntagali akooye obubbi bw’ettaka.  Agamba nti ababbi b’ettaka tebatya ttaka lya nnyumba za Katonda. N’erya Kanisa nalyo balibba.

Asinzidde mu kkamisa ya All Saints e Nakasero .Wabula asabye wabeewo emirembe n’okusonyiwagana eri abo abatakwatagana ate  ne mu mawanga awali entalo nga Sudan.