Rev Fr Edward Muwanga, Parish Priest wa St. Charles Lwanga Catholic Parish Ntinda avuddeyo neyetondera Bannayuganda kwekyo ekyaliwo omwana omuto omuwala bweyaggya okubatizibwa ngavuga ekimotoka ky’abaana mu Ekereziya.

Obutambi obwatambuzibwa ku mutimbagano bwalaga omwana omuto ngayingira Ekereziya mu kimotoka ky’abaana eky’amasanyalaze okuva ku mulyango omunene okutuuka ku wolutaali era nga waliwo nowa kkamera eyali akwata buli kimu ekigenda mu maaso.

Abali mu Kereziya batunula nga basobobeddwa so nga abamu abagambibwa okuba abazadde naboluganda bbo balabika nga basanyufu nnyo nekyali kigenda mu maaso.

Abantu bangi bavuddeyo nebanenya abazadde b’omwana ono olw’ekifaananyi kyebalaze eri abaana abalala ababadde bazze nabo okubatizibwa ate abalala nebanenya abakulira Ekereziya eno olwobutawabula bazadde bano.

Rev Fr Edward Muwanga, agamba nti ekyabaddewo tekyawadde kifaananyi kirungi nti era kyakoleddwa nga tebasoose kusaba lukusa kuva eri Kereziya. Ono agamba nti yeyakitegeddeko okutuusa ng’omukolo guwedde nategeeza nti singa yakitegeddeko yandibadde takikiriza.

Muwanga agamba nti kino bakikoledde mu kaseera nga ba Ffaaza tebanayingira era nasuubiza nti kino tekijja kuddamu kubaawo.

Amateeka agafuga Ekereziya (Canon 1210) gagamba nti Ekereziya kifo kya kitiibwa nnyo era nga ebintu ebirina okuyigizibwamu oba okukolebwamu birina okuba nga byeyambisibwa mu kusinza oba nga bikwatagana n’eddiini nga bisaanidde okuleetebwa mu kifo ekitukuvu.

Nga 17-March-2023 Pulezidenti Yoweri Kaguta Museveni; “Omuntu bwaba yabba amabaati agaali aga ba Karahuma nagawa abantu oba amasinzizo oba amasomero mu kitundu kyakiikirira buba buli bwanguzi (Political corruption). Kuba kugulirira balonzi basobole okukulonda. Wano obeera otadde ebyokwerinda by’Eggwanga. Abo bonna abagatwala balina okugazza oba omuwendo gw’ensimbi ogubalirirwamu amabaati gano naye era balina okukwasibwa Poliisi bavunaanibwe mu mateeka g’eggwanga Uganda. Nange njakukola ekyetaagisa, Poliisi bwenamala okukola okunoonyereza.”

Sipiika wa Palamenti Anita Among; “Tetukigenderera kulumya Bannayuganda naddala bwekituuka ku musolo. Tulina abantu bangi abatutunuulidde era bwotandika okuggya omusolo ku mafuta g’ettaala ngolemereddwa okutwala amasanyalaze mu byalo, kati olwo nakomawo? Ndowooza nze nnumiriddwa ennyo olw’abantu bange obutaba n’amasanyalaze mu byalo. Tebasola nakwegulira Solar.”

Sipiika Anita Among avuddeyo ku kkoligo eyamuteekeddwako Gavumenti ya Bungereza; “Nawulidde nti nina ebyobugagga bingi nnyo e Bungereza nti era nina ne akawunti mu bbanka z’e Bungereza nnyingi. Ekyenaku nti nakagenda e Bungereza omulundi gumu . Sirinaayo yadde ka kappa. Sisaaliddwa yadde, era bwebaba balowooza nti ninayo ebyobugagga babitwale byonna balabe oba navaayo nenemulugunya. Ne kapa nayo mugitwale.”

Omwogezi wa Poliisi y’ebidduka SP kananura Michael yavuddeyo nategeeza; “Ekitongole kya Poliisi y’ebidduka kyakutte emotoka 93 olunaku lweggulo ku Poliisi ezenjawulo nga; Wandegeya, Katwe, Kabalagala, Kajjansi, Kawempe, Jinja Road, Kiira Division, Kira Road ne CPS.
Emotoka ezakwatiddwa zibadde zirina obugombe bwa Poliisi mu bukyamu, ebitaala byawaggulu, amataala agakyuusiddwamu wamu n’okuvugira ku ludda lwebatalina kuvugirako. Ba ddereeva bagiddwako sitaatimenti era nga balindirira kusimbibwa mu Kkooti bavunaanibwe.
Ebikwekweto byakugedera ddala mu maaso okutuusa ng’emotoka zino zonna zikwatiddwa. Poliisi erabula abagoba b’ebidduka mwenna wamu ne bannannyini motoka ezirina ebintu ebyo waggulu mu bumenyi bw’amateeka okubiggyako mu bwangu nga tezinakwatibwa.”