Munnakibiina kya NRM era omuwagizi waakyo lukulwe mu Disitulikiti y'e Jinja afiiridde mu kkomera ly'e Kirinya gyeyasibibwa oluvannyuma lw'okulemererwa okuliyirira owa FDC eyamuwangula mu kkooti mu musango gw'akalulu .

Patrick Bakumweire ow'emyaka 50  abadde omukunzi omukuukuutivu owa NRM mu Jinja nga yavuganya  ku kifo kya Ssentebe w'eggombolola y'e Budondo n'awangulwa Wabika Ayubu owa FDC kati z'embuyaga ezikaza engoye. Yali yatwala Ayubu mu kkooti wabula nebamusingirayo era n'alagirwa okuliyirira munne obukadde ataano mu bubiri (52 Million) eza Yuganda wabula nezimulemerera era n'asindikibwa mu kaduukulu k'e Kirinnya akulunguleyo emyezi 16 gy'afiiridde,  afudde enkya ya leero era abakulira ekkomera lino omulambo nebagukwasa abooluganda lwe okuziika  

Wabula omubeezi wa Minisita avunaanyizibwa ku bibiina by'obwegassi, Gume Fredrick Ngobi akyaliddeko lw'omuhenzi era n'ategeeza nti NRM egenda kuvunaanyizibwa ku by'okuziika byonna  

Kanyama agambibwa okukuba omuyimbi omugenzi Moses Ssekibogo alias Mowzey Radio enkya ya leero akyusiddwa n'azzzibwa ku Police y' Entebbe etwala ekitundu mw'agambibwa okuddiza omusango.

Godfrey Wamala nga yakazibwako lya Troy yagombeddwamu obwala mu kiro ekiyise e Kyengera mu Disitulikiti y'e Wakiso oluvannyuma lw'abatuuze okutemya ku Police nga bamulamye mu nju ya mukwano gwe gy'abadde yeekukumye. 

Troy ng'agombeddwamu obwala, yasoose kutwalibwa ku Police y'e Katwe n'akola Sitatimenti oluvannyuma n'atwalibwa Entebbe.

Omwana omuwala wa myaka 16 agudde mu mugga Namatala okuliraana ekibuga Mbale n'afiiramu bw'abadde ataasa nnyina amazzi gwegabadde gatwala .

Ekikangabwa kino kugudde ku kyalo Bunyolo ekisangibwa mu ggombolola y'e Kamonkooli mu Disitulikiti y'e Budaka . Kitalo !!

Abeerabiddeko n'agaabwe bagamba nti omwana ono kati omugenzi abadde agenze ne nnyina ku mugga okwoza engoye wabula nnyina bw'agenze okusena amazzi n'alinnya awali amazzi amangi era omwana bw'adduse okutaasa nnyina ate ye n'abbira era naafiirawo kyokka ate abadduukirize nebawonya nnyina . Kitalo !!

Abachina mu Yuganda batandise okwegatta ku nsi yonna okwaniriza omwaka gwabwe gwebayita omwaka gw' Abachina ogw'embwa.

Guno gwe mwaka ogusinga okuba ogw'ebyafaayo mu China era nga mu mwaka guno,  biba bikujjuko byennyini ebiwedde emirimu era nga wano mu Yuganda gujja kutongozebwa nga ennaku z'omwezi 16 Mukutulansanja omwaka guno era guyitibwa SRING FESTIVAL. 

Guno gubadde n'ebyafaayo bya myaka 4000 era nga amaka agasinga lwegasisinkana okubeera awamu,  nebalongoosa amaka gaabwe era nga bagamba nti mukissera kino webeegoberako ebintu byonna eby'ebisiraani nga bakuba ebide,  batulisa ebiriroliro okwetoloola amawanga gonna. 

Mu nteekateeka eno Abachina bagenda basindikira bannaabwe ebbasa ezirimu ensimbi zebayita ez'emikisa nebazigabira abana . Omwaka gwabwe guno gukwatira ddala emyezi 12 naye nga bagutambuliza ku bisolo omuli : Engamiya,  Embwa,  Emisota,  obumyu,  Endiga, Enkima n'ebisolo ebirala 

Abateesiteesi b'ebivvulu wano mu ggwanga basabye  Gavumenti efulumyewo mangu  Alipoota ezikwata ku ttemu erikolebwa ku Bannakatemba n'abayimbi awamu n'abawandiisi b'ennyimba.

Bano bagamba nti bannaabwe bangi abafudde mu ngeri efaanana nga eya Mose Radio naye tewali alipoota yonna yali ekoleddwa ab'ekitongole ekya Police. 

Basinzidde mu kukungubagira Moses Ssekibogo Nakitinge alias Mose Radio e Lubaga awamu n'e Kololo. 

Abayimbi,  Bannakatemba n'abavubuka bonna basabiddwa okweyuna amasinzizo nga eno basobola okuzimbirayo obulamu bwabwe ate n'okufunirayo okuwonyezebwa okw'endowooza n'emitima gyabwe.  

Ffaaza Deogratious Kiibi Kateregga asinzidde mu Lutikko e Lubaga mu kusabira Omugenzi Mose Radio n'gamba nti : 

" Okugenda mu ssinzizo kikukakatako,  abavubuka abali wano twetaaga Mukama,  Mujjenga mu masinzizo nga muli balamu, tetubalinze nga mufudde mwokka, mwesige Mukama ennaku z'okusinza zimanyikiddwa".

"Bw'obeera Ssereebu mu maaso g'abantu, twagala obeere Ssereebu mu maaso ga Katonda,  obwa Ssereebu tebukoma wano wokka naye ne mu maaso ga Katonda,  nga bwebakukubira emizira nga olinnye ku ssiteegi,  ne ba Malayika bwebaba bakukubira emizira.Obulamu obutaliimu Katonda eba bbomu ".

Ffaaza Kateregga ayongerako nti "Mukolerere emirambo gyammwe. Obulamu bwo kikulu, oteekwa okwerabirira , twefeeko… Nti oli afudde kadomola ka Walagi nebagamba nti Mukama bw'atyo bw'asazeewo !!!. Omubiri gwo kintu kikulu by'oteekamu kubanga gutereka omwoyo ". Ffaaza Deogratious Kiibi Kateregga bw'ayogedde n'akubirwa emizira nasinsi w'omuntu  mu Lutikko e Lubaga. 

Ab'obuyinza mu Munisipaali y'e Ntebbe baggaddewo ebbala eyitibwa Da Bar Omuyimbi Moses Ssekibogo aka Mose Radio mweyakubirwa ekimuviiriddeko okugenda ezzirakumwa .

Pulezidenti Museveni akungubagidde Omuyimbi Moses Ssekibogo aka Mose Radio afudde enkya ya leero ku ssaawa kkuminabbiri ku Case Hospital mu Kampala .

Pulezidenti nga abadde yaakawaayo ensimbi obukadde asatu ku bujjanjabi bwa Mose ennaku bbiri emabega , ayise mu mukutu gwe ogwa Twitter n'ategeeza nti Radio abadde n'ekiseera eky'omumaaso ekitangaavu mu bulamu bwe 
  

Police enkya ya leero ekedde kuzingako maka g' aduumira Police mu Disitulikiti y'e Buyende, ASP Muhammad Kirumira agasangibwa e Bulenga mu Disitulikiti y'e Wakiso n'ewalirizibwa okusala enzigi okusobola okumuggya mu nju ye mw'abadde yeesibidde.

Kirumira yeesibidde mu nju okuva ku ssaawa kkuminabbiri ez'okumakya oluvannyuma lw'okukitegeera nti abaserikale ba FLYING SQUAD n'abapoliisi abalala baabadde bamaze okugoba mu makaage okumukwata wabula n'abasaba ekiwandiiko ekibawa olukusa okumukwata nga bayanjala ngalo.

Kino kijjide mu kiseera nga akawungeezi ka jjo Afande Kirumira yavuddeyo n'alangirira nga bw'avudde mu kitongole kya Police era agenda kwekolera bintu bye birala omuli okwesimbawo mu by'obufuzi

Wabula mu kiseera nga Police esala oluggi lwe, Kirumira ng'ali mu kyambalo kya Police asobodde okwogerako ne Bannamawulire mu ddirisa n'ategeeza nti yeewunyizza nnyo okuba nti Police ekoze bw'eti n'etamulinda kumukwatira Nagulu gy'abadde agenda okulabikako enkya ya leero  ku misango egimuvunaanibwa