Abdu Katuntu (Bugweri County) avuddeyo nategeeza nga bwatasobola kuteeka mukono ku kiwandiiko kiggya obwesige mu ba Kkamisona ba Palamenti nga agamba nti Akakiiko kakulembera aka Parliament’s Rules Committee, kekaweebwa obuyinza okutunula mu nsonga ezikwatagana neneyisa y’Ababaka nga nabwekityo ekigenda mu maaso essaawa eno Ababaka bano bandifundikira nga basindikiddwa mu Kakiiko kakulembera.

Omubaka Luttamaguzi Paulson Ssemakula avuddeyo nasambajja ebibadde bitambuzibwa nti yomu ku bafunye obukadde 25 obutateeka mukono ku kiwandiiko ekiggya obwesige mu bakkamisona ba Palamenti 4 abeggemulira ensimbi ezisoba mu kawumbi nga agabamba nti ye ekikyamugaanye okuteekako omukono kwekuba nti omuntu eyaleeta ekiteeso kino Theodore Ssekikubo (Lwemiyaga County) tamwesiga okuba nti kyakulemberamu kiyamba Bannayuganda kuba mu mwaka gwa 2017 tabalyamu olukwe nawagira okuggya ekkomo ku myaka gya Pulezidenti.

Omumyuuka wa Ssentebe owa massekkati owa Patriotic League of Uganda, Frank M. Gashumba alumbye Director for mobilization, era Omubaka akiikirira Igara East mu Disitulikiti ye Bushenyi Michael Mawanda.
Kino kyaddiridde Gashumba okuvaayo nawandiika ku mukutu gwa X ngayagala abavunaanyizibwa ku byokwerinda mu Ggwanga okuvaayo bunnambiro bataase Bannayuganda ku bakifeesi ababatiggomya wabula Omubaka Mawanda namuyita Bunnambiro alabikeko mu Kakiiko akakwasisa empisa aka PLU ku kitebe e Naguru.
Gashumba yamwanukudde namutegeeza; “Oyinza otya okumpita ngomuntu atalina byakukola oba buvunaanyizibwa, ggwe nozuukuka buzuukusi nompita nti ndabikeko gyoli bukubirire leero!? Nkujjukiza nti siri mukozi wa Gavumenti nga ggwe afuna obukadde 30 n’okusoba buli mwezi.
Akakiiko kammwe akakwasisa empusa kazuukuse ku ka tweet kenawandiise ku nsonga zebyokwerinda ezitadde Bannayuganda ku bunkenke! Kinewuunyisa omuntu eyeyita omukulembeze okufuula kyempandiise ekyokukola mu kifo kyokukwatibwako ku nsonga y’abavubuka abatigomya Bannayuganda. Singa nabadde wakuyitibwa mu Kakiiko akakwasisa empisa, nandiyitiddwa CDF oba IGP, osinziira kuki okumpita, PLU kitongole kyabyakwerinda nti kirina okumpita ntangaaze ku nsonga yebyokwerinda gyenayogeddeko?

Kati nkutegeeza nti sisuubirayo bwenkanya okuva mu bantu bonyigiriza okukola byoyagala. Nekino kankikutegeeze ndi mu PLU lwa Gen. Muhoozi Kainerugaba, nkimanyi bulungi nti ggwe ne Daudi Kabanda muninako obukyaayi buyitirivu.
Nga bwosazeewo okumpita, ddi lwogenda okuyita mukwano gwo (Minisita) eyaswaza ba Mobilizer ba PLU bweyabba omucceere ne nnyama Gen. Muhoozi bweyakyaala e Masaka? Omuntu owebitiibwa ebyo byonna Hon. Minister afuuka atya ekingiringiri nabba ennyama n’omucceere ebyalina okuliibwa abantu abaavu abajja mu lukuŋŋaana? Essaala zokka tezisobola kutaasa Ggwanga lino.
Ye owaaye, tubuulire, ddi lwogenda ku kitebe kyaba mbega ba Uganda Police Force ku nsonga z’obukenuzi n’okubba ssente ezaali ezokuliyirira abantu abaavu ebebibiina byobwegassi eziri eyo mu buwumbi 164?”

Nampala w’Ababaka ba Forum for Democratic Change mu Palamenti akiikirira Mawokota South Yusuf Nsibambi avuddeyo nagenda okuteeka omukono ku kiwandiiko ekiggyamu ba Kkamisono ba Palamenti 4 abegemulira akasiimo akaweza ensimbi akawumbi 1 mu obukadde 700 so nga ate baali bafuna obukadde 23 nga ngomusaala buli mwezi. Ono yegaanye okuba nakakuku konna ku bantu bano 4 netegeeza nti okukola kino yagenderedde kuwa abavunaanibwa omukisa okunnyonyola Bannayuganda ku ngeri gyebabadde batambuzaamu emirimu mu Palamenti. Ono agamba nti bano bonna abawa ekitiibwa kuba bakiikirira bantu nti wabula asuubira nti Bannayuganda balina okumanya engeri Ababaka gyebakolamu emirimu nti era balina okubeera abeerufu mu buli kyebakola.

Bigirwa Moses avuddeyo nategeeza nga bwatandiseewo ekisinde ekikye ngayawukana ku Kibiina kya National Unity Platform. Bigirwa agamba nti ekisinde kyabwe kyakuyitibwa Eastern Revolutionary Platform (ERP). Ayongeddeko nti Kyagulanyi Ssentamu Robert aka Bobi Wine talina kyagatta ku Busoga ye kwekutandikawo ekisinde ekigenda okugatta ku kitundu kino.

Minisita avunaanyizibwa ku nsonga z’omunda mu Ggwanga Maj. Gen. Kahinda Otafiire avuddeyo nakalataira Ssaabadduumizi wa Uganda Police Force omuggya IGP Abas Byakagaba obutasaawo ntalo na bannabyafuuzi abali ku ludda oluvuganya Gavumenti wabula abakwate mu ngeri amateeka gyegamulambikamu bwewaba nga waliwo ebitatambula bulungi.

Minisita omubeezi owettaka avunaanyizibwa ku nsonga zamayumba Persis Namuganza asekeredde ba Kkaminsona ba Palamenti olw’okukemererwa okuyimirira ku bigambo byabwe eby’okulwanirira abantu, ne batuuka okwegabanya ensimbi y’omuwi w’omusolo bwebeewa akasiimo ngate be bamu ku baakulemberamu enteekateeka y’okumuggyamu obwesiga ku kifo ky’obwa minisita omwaka oguwedde.

Bino Minisita Namuganza abyogedde bwabadde assa omukono ku kiwandiiko ekiggya obwesige mu ba Kkaminsona ba Palamenti abana(4) okuli; Solomon Silwany @National Resistance Movement – NRM, Prossy Akampurira(NRM), Afoyochan Easter (NRM), ne Mathias Mpuuga Nsamba(NUP) nga balangibwa okwegabanya ensimbi ezisoba mu kawumbi kalamba ne kitundu nga akasiimo.

Minisita Namuganza ategeezezza nga ye bweyagibwamu obwesige ku nsonga ezitaalimu na kulya nsimbi ya muwi wa musolo nga n’olwensonga eyo tayinza butassa mukono mu kiwandiiko kigoba bali banguzi.

Akulira oludda oluwabula Gavumenti mu Palamenti Joel Ssennyonyi agamba akasiimo tekandibadde kabi wabula kyandisoose kuleetebwa mu Palamenti nekikubaganyizibwako ebirowoozo, wabula obutaleetebwa kikifuula okuba obuli bwenguzi era naye ataddeko omukono okuggya obwesige mu ba Kkaminsona.

Eyaliko Kkaminsona mu Palamenti, Omubaka wa Munisipaali y’e Mityana Zzaake Francis ye akubye gudiikudde era asanyukidde entekateeka eno eyokugoba ba Kkaminsona ba Palamenti abeenyigira mu kulya enguzi okuyita mu nkola ey’okubaggyamu obwesige era naye yeegasse ku babaka abataddeko omukono.