Omugoba wa Bodaboda akubiddwa akatayimbwa abantu abatannategeerekeka n’akalirawo ne Pikipiki ye nebagitwala mu kiro ekikeesezza olwaleero e Nakabago ekisangibwa mu Munisipaali y’e Mukono.
Ssenfuma Richard ow’emyaka 27 nga ono abadde mutuuze ku kyalo ky’e Nyenje era nga kwekuli ne ssiteegi kwabadde akolera. Kigambibwa nti abatemu abamumizizza omusu baabadde batambulira mu mmotoka njeru kika kya ”Mark ii” nnamba UAK 682S.
Ssentebe w’abagoba ba Bodaboda mu kibuga Mukono akakasizza embeera eno wabula ye aduumira Poliisi y’eMukono Afande James Mwanga bwatuukiriddwa agaanye okubaako kyayogera ku nsonga eno .