Kayima omuggya, Gabriel Kabonge atuuziddwa mu butongole kubwami bw’essaza Mawokota wamu n’abamyuka be Patrick Ssemalawa ne Godfrey Mujuzi Pizarro.
Minisita w’emirimu egy’enkizo David Mpanga yakoze omukolo gw’okubatuuza ng’ali wamu ne Ssaabawolereza w’obwakabaka Owek Christopher Bwanika ne Minisita omubeezi owa Gavumenti ez’ebitundu Owek Joseph Kawuki ku mbuga y’essaza e Butoolo Kamengo.
Owek Bwanika asabye Kayima n’abamyuka be okuweereza banna Mawokota n’obwesige wamu n’okunyweza obwa sseruganda mu bantu ba Kabaka.
Owek David Mpanga akubirizza abatuuziddwa okulwanyisa obwavu, obutamanya, enjawukana kubanga Kabaka abantube abatwalira wamu, okulwanyisa ekibba ttaka, okukuuma obutonde bwensi, abasabye babeere eky’okulabirako mu nsonga z’obukulembeze.
Kabonge azze mu bigere bya David Ssekyeru eyava mu bulamu bwensi eno.