Omuyizi eyakubwa bbomu akoze ebigezo

Ashraf Igembe omuyizi wa Mother Care Bright Academy e Kagoma eyakubwa bbomu ng’ali mu kibiina omwezi oguwedde yatwaliddwa okukola ebigezo ng’ali mu bulumi nga tasobola wadde okuwandiika, era obwedda ayogera bwogezi ne bamuwandiikira.
Bazadde ba Igembe baamukeezezza ku Kadic Hospital e Kawempe oluvannyuma lw’okusula obubi ng’alumizibwa mu lubuto. Ku ssomero lya St. Andrew C.O.U e Migadde gye yatuulidde ebibuuzo aamutuusizzaayo ku ssaawa 2:00 ez’oku makya.
Kyokka waabaddewo okukaayana wakati w’abakuuma ebigezo n’abazadde abaabadde bawakanya ky’okumuteeka mu kibiina omuli enfuufu mw’aba akolera ebibuuzo. Oluvannyuma abakuuma ebigezo baapondoose ne bamuteeka mu ofiisi y’omukulu w’essomero gye yakoledde ebibuuzo.