Omuserikale wa Uganda Police Force avudde mu mbeera n’akuba banne amasasi okukkakkana ng’omu afiiriddewo ate ababiri nebagendera ku bisago. Ensasagge eno ebadde Wakiso mu ttawuni kkanso y’e Kajjansi mu Kinyarwanda mu Akright Estate, mu kiro ekikeesezza olwaleero.
Kigambibwa nti abasirikale bano baafunyemu obutakkaanya bwebaabadde banywa omwenge mu bbaala emu ekyaviiriddeko omu okunona emmundu mu maka g’abadde akuuma n’abasindirira amasasi oluvannyuma n’atandika okukuba amalala mu bbanga okugumbulula abantu ababadde batandise okukungaana.
Poliisi y’e Kajjansi eyitiddwa n’eggyawo omulambo n’abaakubiddwa amasasi n’ebatwala mu ddwaliro okufuna obujanjabi.
Omwogezi wa Poliisi owa Kampala Metropolitan Police Patrick Onyango agambye nti bakyanoonyereza n’oluvannyuma bafulumye alipoota ku bibaddewo.