Gavumenti etaddewo ensimbi obuwumbi 150 ezigenda okukozesebwa okuzzaawo olutindo lw’omugga Katonga, ku luguudo oluva e Kampala okudda e Masaka.
Olutindo luno lwagwamu ku nkomerero y’omwezi ogwokutaano omwaka guno oluvannyuma lw’omugga Katonga okubooga neguwaguza ekyasannyalaza eby’entambula.
Mu kiseera kino emmotoka entono baazikolera ekitundu wezisobola okuyita, wabula ng’ennene ezetikka ebintu ebizito tezinakkirizibwa kuddamu kulukozesa nga zikozesa oluguudo lwa Mpigi- Gomba, Ssembabule – Villa Maria.
Ensimbi zino zanjuddwa omumyuka wa Sipiika, Thomas Tayebwa bw’abadde alambula emirimu ekitongole kya Uganda National Roads Authority gyekikoze kasookedde batandika ku ddimu lino.