Omumyuka wa Katikkiro asooka era Minisita w’eby’emirimu n’obuyiya,Prof. Twaha Kigongo Kaawaase, agguddewo olusiisira lw’ebyenjigiriza ku ssomero lya old Kampala secondary School. Olusiisira luno lwakumala ennaku ssatu nga lugendereddwamu okulungamya abayizi n’abantu ab’enjawulo ku nsonga z’ebyenjigiriza n’eby’obulamu ssaako ne tekinologiya.
Bwabadde aluggulawo, Owek Kaawaase asabye abakulu b’amasomero okulungamya abaana mu bya tekinologiya kibasobozese okuja mu kyasa kino eky‘obuyiya. Agasseeko nti enkyuukakyuuka ezzeewo mu tekinologiya ebeere kyakuyiga eri abantu, bagyeyambise okwongera okuyiga n’okwongera omutindo ku mirimu gyabwe olwo lwebajja okugenda mu maaso.
Minisita weby’enjigiriza, Dr. Prosperous Nankindu Kavuma ategeezezza nga olusiisira luno bwelugenda okukyuusa okumanya n’okutegeera kw’abayizi bongere okwojiwala mu bwongo.
Ebitongole eby’enjawulo byolesezza emirimu gyebakola omuli; Uganda Police, Parliament ya Uganda, Institute of Certified Public Accountants, bakayiira Garage, amasomero ag’enjawulo n’ebitongole ebirala ebiwerako.