Ababaka ba Palamenti Bannakibiina kya National Unity Platform okuli; Ssegiriinya Muhammad aka Mr. Updates ne Ssewanyana Allan olwaleero bavuddeyo nebalaga okusiima kwabwe eri omuwaabi wa Gavumenti e Masaka Birivumbuka Richard olwokuvaayo nabagambira ku basirikale b’Amakomera abaali babakooza akagiri mu Kkomera e Kigo gyebali.
Bano basabye Kkooti ebakirize beyimirirwe kubanga abaana baabwe tebanaba kudda ku masomero olw’okuba nti ssente ziri mu bbanka ku akawunti zaabwe nga bebalina okuteekako emikono okuziggyayo.
Hon. Ssewanyana Allan yeebazizza Omusawo Mukwaya Ben eyamuyamba najanjaba omwana we kyokka naye era asabye Kkooti ekirize beyimirirwe baddeyo bakikirire abantu baabwe.
Ye omuwaabi wa Gavumenti Birivumbuka Richard akakasiza Kkooti nti olutuula oluddako ajjakuba amalirizza okunonyereza era wakuleeta obujulizi ababaka basindikibwe mu Kkooti Enkulu. Omulamuzi Nantege Christine omusango agwongezaayo okutuusa nga 10/3/2022.