Omusuubuzi w’omu Kampala Hamis Kiggundu avuddeyo nasaba Kkooti etawulula enkayana z’ebyenfuna egobe obujulizi bwa Diamond Trust Bank.
Kiggundu nga ye nannyini Kkampuni ya Ham Enterprises Limited ne Kiggs International (U) limited yatwala bbanka ya DTB -Uganda, ne DTB-Kenya mu Kkooti nga agamba nti zajja obuwumbi 120 ku akawunti ze nga tabawadde lukusa.
Olwaleero Bannamateeka ba Kiggundu bakulembeddwamu Fred Muwema bagamba nti bali bataddeyo okusaba kwabwe nga baagala Kkooti egobe obujulizi ba DTB kuba bwalimu ebituli.
Muwema agamba nti kyali kimenya amateeka DTB Kenya okwenyigira mu bizineesi n’ensimbi ne Ham mu Yuganda wamu n’okulagira banaabwe mu Yuganda aba DTB Uganda okuteekesa endagaano y’ebbanja mu Yuganda nga bagikolera Kenya.
Muwema agamba nti singa okusaba kwabwe kuyitamu, ensala y’Omulamuzi Henry Peter Adonyo enabaawo nga 5 – October – 2020, okuwulira omusango guno okulala kujja kuba tekwetaagisa.