Nga 10 – July – 2019 Ssaabasajja Kabaka ajja kulambula ensiisira z’eby’obulamu nga wakusookera ku mwalo e Kawongo mu gombolola ye Galiraya. Eno Ssaabasajja wakusomesa ku nsonga za mukenenya.
Bwava e Kawongo Beene wakwolekera mu gombolola ye Kitimbwa asomese abantube ku nsonga z’okugema n’okulwanyisa endwadde ez’enjawulo.
Entikko y’emikolo yakubeerawo enkeera nga 11th ku ssomero lya St. Mark P/S e Busaana.
Bwabadde ayanjula enteekateeka eno, Minisita w’enteekateeka n’Enkulaakulana y’abantu, eby’enjigiriza, n’eby’obulamu, Dr. Prosperous Nankindu Kavuma, agambye nti Ssaabasajja ayagala abantube babeere balamu era ensiisira z’eby’obulamu zigendereddwamu okusomesa n’okutegeeza abantu engeri gyebalina okugemesa n’okwerinda endwadde ez’enjawulo.
Omulamwa gw’omwaka guno guli; ” ABAAMI TUBEERE EMUNYEENYE MU KULEETAWO OBULAMU OBULUNGI”.