Pulezidenti Museveni asoomoozezza abo bonna abawakanya ebbago ly'etteeka ly'ettaka 

Pulezidenti Yoweri Kaguta Museveni asoomoozezza abo bonna abagamba nti aliko ettaka lyeyali anyaze mu myaka asatu mu gumu, nti baleete obujulizi. 

Museveni agamba nti ettaka lyokka lyeyafuna liri mu bitundu by'e Bar-alegi mu Disitulikiti y'e Otuke, nti yalifuna asobole okusinziira awo okulwanyisa Joseph Kony ate n'ababbi b'ente e Karamoja era kati mulimu nkambi ya maggye .

Wetwogerera Pulezidenti Museveni ali mu bitundu by'amambuka ga Yuganda ng'asinziira mu mikutu gya Laadiyo ez'enjawulo okunnyonnyola abantu boomu bitundu by'e Lango ne mu mambuka g'eggwanga ku nsonga z'obwa nnannyini bw'ettaka ate n'engeri Gavumenti gy'eyinza okufunamu ettaka ku bantu ekolereko emirimu egikulaakulanya eggwanga 

Ayongerako nti ab'oludda oluvuganya Gavumenti balemesa enkulaakulana ezireetebwa NRM.