Munnamawulire Ddamba Wiziri aguddewo emisango okuli assault, robbery ne malicious damage ku bakozi b’ekitongole eky’obwannakyewa ekya Integrated Community Based Initiatives (ICOBI).
Ku File eri ku Sheema Police Station SD Ref 49/01/08/2018, Ddamba agamba nti bakozi ba ICOBI bamukuba ne batwala camera n’essimu ye nga 30 – July – 2018 bweyali asaka amawulire g’abantu abaali bekalakaasa nga bawakanya ebyava mu kulonda kwa Sheema Municipality okwawangulwa Elioda Tumwesigye ng’omubaka.
Oluvannyuma lw’okukubwa Ddamba yaddusibwa mu ddwaliro lya Mayanja Memorial Hospital e Mbarara gy’abadde afunira obujanjabi era nga yasiibuddwa olunaku lw’eggulo. Agamba nti abamukuba bali bakulemberwamu Godwin Arikwera eyamulagira okuwaayo Camera ye oba okutibwa nga agaanye. Agamba nti Alikwera yalina ejjambiya ate nga abalala baalina amayinja nga bano kwaliko Sheema District Community Liaison Officer Coleb Twesigye, Muganda wa RDC w’e Sheema Robert Bijuuka, Charles Tashorora, n’abakozi ba ICOBI.
Poliisi y’e Sheema egamba nti ensawo ne camera ya Ddamba ebirina ebiterese bulungi. Wabula Robert Ssempala akulira ekibiina ekirwanirira eddembe lya Bannamawulire agamba nti yagaanye Ddamba okubikima Poliisi esooke ennyonyole engeri gyeyabifunyeemu.
Ddamba agamba nti alumizibwa omutwe wamu n’obulago nga byava kukutugibwa.
