Minisita w’ebyobusuubuzi n’amakolero era nga ye mubaka mu Palamenti owa Mawokota ey’amambuka, Amelia Kyambadde agugumbudde abazadde abatafaayo ku baana ab’obuwala nebatuuka n’okwefumbiza nga bakyali bato.
Amelia Kyambadde okwogera bino abadde aggalawo omusomo ogukwata ku byobulamu ogwayindidde ku ddwaliro e Butoolo mu Disitulikiti y’ e Mpigi ogugendereddwamu okubangula abantu ku ngeri gyebayinza okwewalamu omusujja gw’ensiri.
Asinzidde wano n’akukkulimira abazadde olw’okusuulawo obuvunaanyizibwa bwabwe ekiviiriddeko abaana baabwe abangi okuzaalira ku myaka emito ddala wakati wa 13 ne 15. Era mu kino atiisatiisizza n’okuweweenyula abaaba abato abawala baanaasanga nga beemoola n’obulenzelenzi.