Omulabirizi wa West Buganda, Bp. Henry Katumba Tamale yeemulugunyizza ku ssente ekitongole ekivunanyizibwa kukuwandiisa bizinensi n’obufumbo mu ggwanga ekya Uganda Registration Services Bureau ze kijja ku bantu ababeera bagenda okugattibwa mu masinzizo okwefunira obufumbo obutukuvu .
Bp. Tamale agamba nti ssente zino zandibadde zigabanibwa wakati w’ekitongole n’amasinzizo kubanga omulimu gw’okugata n’okuwandiisa obufumbo nabo nga bannaddiini bagulinamu omukono ogw’amaanyi.
Ategeezezza ng’omulimu ogusinga bwe guli ogwa bannaddiini okugeza; empapula zonna ezikwatagana n’okuwandiisa obufumbo zikolebwa mu masinzizo olwo abagole ekitongole ne bakitwalira empapula nga ziwedde okukolebwako era ne basasula ekitongole kino emitwalo 35,000.
Katumba asinzidde mu musomo gwa bannaddiini ogwategekeddwa ekitongole kino ku Brovad Hotel mu kibuga Masaka n’ekigendererwa ky’okubasomesa emitendera gy’okuwandiisa bizinensi zaabwe n’obufumbo obutukuvu.
Kizza Zeus ng’ono y’avunaanyizibwa ku kuwandiisa obufumbo mu kitongole kino alaze bannaddiini akabi akali mu kugatta abantu mu bufumbo obutukuvu nga tebagoberedde mitendera ekiviiriddeko abafumbo okufuna ebizibu entakera.
Leave a Reply
You must be logged in to post a comment.