leeta vidiyo eriko eddoboozi – Dr. Hilderman

Dr Hilderman avuddeyo n’ekiwandiiko ngadda mu Bebe Cool;
Mu 2016 nali omu ku bayimbi abatalaaga Yuganda okunoonyeza Pulezidenti Yoweri Kaguta Museveni, era nga mu mazima twalina endagaano wakati wange ng’omuyimbi ne Bannamateeka ba KK Advocates era nga nina okugisaamu ekitiibwa.
Naweebwa omulimu gw’okuyimba era nengukola nga ngoberera endagaano gyenali nkoze era nensasulwa. Ku mulundi guno okunoonya akalulu kuno kwamanyibwa nga Tubonganaawe era nga kwatongozebwa Munyonyo era nga nayitibwa nga omugenyi. Omugenyi omukulu yali Pulezidenti Museveni era bwatyo neyeyama okuwa abayimbi obukadde 400 bugende mu SACCO yaabwe. Bebe Cool yaweebwa omuzindaalo okwogera ku lw’abayimbi abalala.
Bwenali ku Sheraton olwegulo olumu, munange omu nankubira essimu nga antegeeza nga Bebe Cool bweyali awa ssente abayimbi bonna abaali e Munyonyo mukutongoza Tubonganaawe. Nakubire Bebe Cool essimu nangamba musisinkane ku Serena bwenatuukayo Bebe Cool nantegeeza nti ssente zeyali agaba zaali z’abo bokka abaali mu Luyimba lwa Tubonganaawe wabula sibayimbi bonna. Nasalawo muviire ngende, wabula nali sinaggala luggi Bebe Cool nampita nampa obukadde bubiri (2) era nansaba okuteeka omukono wamu n’amannya gange ku lupapula asobole okulaga embalirira eri eyamuwadde ssente nti era yaziwadde abantu abaalina okuzifuna. Bino byenjogera byandibadde byeyolekera bulungi mu katambi ako lwakuba eddoboozi yalijjeeko.
Okutereezaamu;
– Nali omu kubanoonyeza Pulezidenti Museveni akalulu mu 2016 era kino sikyegaana.
– Okusinziira kundagaano gyenakola ne Bannamateeka abampa omulimu nasasulwa ssente zetwategeragana.
– Endagaano gyetwakola yali yakiseera ekyo so si yalubeerera.
– Tewali bukwakulizzo bwonna obwanteekebwa mu by’obufuzi, ekitegeeza nti nalina eddembe nga Munnayuganda yenna.
– Bwekina nga ssente zino zaali za nsawo ya SACCO y’abayimbi, kyali kimenya mateeka Bebe Cool okugamba ssente zino kuba yali alina zitwalira bakulira SACCO yaffe ng’abayimbi.
– Nafuna obukadde 2 okuva ewa Bebe Cool era nawandiika erinnya lyange ku lupapula era nenteekako omukono, nabwekityo kyandibadde kyabuvunaanyizibwa mu ngeri yonna nga ogezaako okwonoona erinnya lyange byonna nga bwebyali obireete nga kuliko n’amaloboozi anti wagambye okola mbalirira.
– Bannayuganda bandyagadde okumanya nga ggwe ow’ekitiibwa bwewasasaanya ensimbi zaabwe bwekiba nga embalirira gyoyagala okukola tegenderera kwonoona linnya lya muntu.
– Mu mutima mulungi nkusaba otegeeze Bannayuganda ebikwatagana ne SACCO okutandika bituuse kuba waweebwa obuvunaanyizibwa obwo nga bwewategeezezza.
Ngafundikira, Segaanangako kwenyigira mu kunoonya kalulu ka NRM, amazima gali nti sakanoonya mu 2016 mwokka wabula n’emyaka egyayita. Nkiddamu, mbadde wa NRM era nga sikikweka nga era bwesikweka kulaga nti nakyuka.
Ekigendererwa kyaffe kugatta bantu bonna so si kwawulayawula mu bantu. Waliwo ebintu bingi nnyo ebirala ebiruma eggwanga, ebisinga zino entalo z’ekito zolimu. Ggwe nga mukulu waffe wandibadde onoonyereza lwaki Abayimbi abawagira Muzeeyi bamudduseeko. Omulimu gwewandibadde oliko kati kwewala kufiirwa ba Hilderman abalala nga badda ku ludda oluvuganya Gavumenti bwoba nga oyagala nnyo ekibiina kya NRM.
Kulwa Katonda n’ensi yange
Kiyaga Hillay Innocent. Dr Hilderman.

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.

More Stories
omutuuze atiddwa mubukambwe e kira