Kkondo bamumizizza omusu e Mityana
Omusajja ateeberezebwa okuba kkondo asangiddwa ng’amenya olujji lw’ edduuka akubiddwa egimuserengesezza ekalannamo.
Musa Mutebi ow’emyaka 30 akwatiddwa lubona ng’amenya edduuka ly’omusuubuzi Joyce Matovu mu kabuga k’e Buswabulongo akali ku nkingiizi z’ekibuga Mityana mu Municipaali y’e Mityana.
Ekibinja ky’abatuuze kimuguddeko ekiyiifuyiifu nekimukuba mizibu era kati eyiye baavuunise dda.
Omwogezi wa Police mu bitundu bya Wamala, Afande Nobert Ochom agamba nti webatuukidde nga Mutebi mukalu wabula nga kati tebannabaako muntu yenna gwebakwata kulw’ekikolwa kino.
Omulambo gwa Mutebi Police eguggyewo n’egutwala mu ggwanika ly’eddwaliro ly’e Mityana ng’okunoonyereza bwekugenda mu maaso.
