Kitalo! ttipa esse 8 e kyenjojo

Emotoka ekika kya Ttipa nnamba UAU 684C egudde netta abantu 8 n’abalala abawerako nebagendera ku bisago ku kyalo Kyenjojo ku luguudo oluva e Hoima e Kaiso Tonya. Kigambibwa nti eno ebadde edduka emisinde mizibu bwetyo neremerera ddereeva waayo n’egwa.

Ttipa eno ewabye ne yeefuula emirundi egiwera n’oluvannyuma ne yeesulika. Abafudde kuliko; Vincent Wamani, Patrick Businge ate abalala tebategeerekese n’abalala babiri abasimattuse nabo tebategeerekese mannya. Mu kabenje kano bakutuseeko emikono n’okumenyeka amagulu.

Omwogezi wa Poliisi mu Bugwanjuba, Julius Allan Hakiza ategeezezza nti, abatuuze be Kyenjojo awaagudde akabenje kano, beekozeemu omulimu nga bakozesa ejjambiya n’ebirala ne batema ttipa eno okuggyamu abaabadde mu maaso era be baasobodde okutaasa ddereeva n’omuntu omulala. Abaafudde bonna baabadde mabega era bano yabawandudde nga bw’ebalinnyalinnya ne bafiirawo.

Abaawonye baatwaliddwa mu ddwaaliro eddene e Hoima.
Ttipa eno yabadde etwala bbulooka e Kaiso okumpi n’ennyanja Muttanzige (Albert) nga baziggye e Mwendante mu ggombolola y’e Kitoba mu disitulikiti y’e Hoima.