Olukiiko lwa Baminisita ku ludda oluvuganya Gavumenti lwevumbye akafubo k’okwekubaamu ttooci ku ngeri gyebatambuzaamu emirimu n’okutunuulira ensonga zebagenda okusimbako essira oluvannyuma lwa Palamenti okuddamu okutuula okuva mu luwummula.
Bano bakulembeddwamu Nnampala waabwe, John Baptist Nambeshe bagamba nti baakutunuulira nnyo vvulugu eyetobese mu nteekateeka ya ‘Parish Development Model’, embeera y’abasomesa ba ‘Arts’ ku misaala gyabwe n’ensonga y’ebbeeyi y’ebintu eyeekanamye.