Nixon Agasirwe Offiisa wa Poliisi yavuddeyo olunaku lw’eggulo mu kkooti y’amaggye n’alumiriza eyali mukamaawe Gen. Kale Kayihura okuwa Kitatta Abasirikale ba Poliisi okumukuuma.
Agasirwe yakakasizza nti ddala kituufu Kitatta yalina abasirikale ab’emmundu babiri era yabufuna ku biragiro by’eyali omuduumizi wa Poliisi Kayihura. Ku ky’emmundu ebbiri ezasaangibwa n’omusirikale Ngoobi Sowaali, Agasirwe yakiganyi nga agamba nti yeyalagira bawe Ngoobi emmundu ekika kya bbaasitoola ng’endala eya AK47 tamanyi gye yagiggya.
Ono yategeezezza Ssentebe wa Kkooti eno Lt. Gen. Andrew Gutti nti buli kyeyakolanga yakikolera nga ku biragiro bya Gen. Kayihura eyali mukamaawe nga tayinza kumujeemera.
Omusango gwongezeddwayo okutuusa nga March 25 era bonna abasibe okuli ne Agasirwe baziddwa mu kkomera
‘kayihura yeyandagira okuwa kitatta emmundu’ – agasirwe
