Kamalabyonna wa Buganda Charles Peter Mayiga, yebazizza ab’enju y’omugenzi Bishop Misaeri Kawuma, eyali omulabirizi we Namirembe olw’obuweereza n’obuwagizi bweyawayo eri Namulondo.
Bino Katikkiro abyogeredde mu Lutikko e Namirembe, Namwandu w’omugenzi Bishop Misaeri Kawuma, Geraldine Ritah Nabuli Kawuma bw’abadde ajaguza emyaka 90 egy’obukulu.
Katikkiro yebazizza omujaguza olw’okuyimirira n’okuwagira bba mu buweereza eri Namulondo ate n’okukuza abaana abamanyi Kabaka n’agattako nti omulabirizi Kawuma emyaka 32 emabega yatikkira Omulangira Ronald Muwenda Mutebi II kati Kabaka, engule enzungu wamu n’okuzza Namulondo mu Lutikko e Namirembe oluvannyuma lw’entalo zeby’obufuzi ezaaliwo mu kiseera ekyo.
Omulabirizi omubeezi owa Kampala eyawummula, Hannington Mutebi bw’abadde ayigiriza akuutidde abantu bulijjo okutya Katonda kubanga mwemusibuka obugunjufu. Era abajjukizza bulijjo okujjukira okwebaza Katonda ku buwanguzi bwebatuuseeko.
Omujaguza, Mukyala Geraldine Ritah Nabuli Kawuma yebazizza omutonzi olw’ekirabo ky’obulamu bwamuwadde kati emyaka 90 mwafunidde ezadde, emikwano, obuweereza mu kkanisa, mu kisaawe ky’ebyenjigiriza, n’okulaakulanya abakyala nga ayita mu bibiina ebyenjawulo.