Katikkiro Charles Peter Mayiga, olwaleero azzeemu okutikkula Oluwalo mu bimuli bya Bulange. Lwetabiddwamu eggombolola okuva e Buddu, Hon. Medard Lubega Sseggona, MUMUSA High School, okuva e Ssingo, abantu ba Kabaka ab’e Chicago mu Amerika, n’abantu abalala bangi, nga baleese obukadde 34,700,000/=. Katikkiro agambye nti Obwakabaka buvaayo n’enteekateeka ng’Oluwalo ziyambeko okukyusa endaba y’ebintu mu Buganda n’okukomya okwekubagiza.
Annyonnyodde nti ensimbi eziva mu Lulwalo ziyambye nnyo Obwakabaka okubunyisa kaweefube wa Mmwanyi Terimba; okutumbula eby’enjigiriza n’ebyobulamu, awamu n’okuddaabiriza ebifo by’obuwangwa n’ennono.