Mu kaweefube w’ okumalawo ebbula ly’emirimo n’o bwavu naddala mu bavubuka e Mubende, Gavumenti ewaddeyo yiika z’ettaka ataano(50) okuzimbako ekkolero erigenda okusunsula ebirime mu kitundu kino.
Bwabadde akwasa musiga nsimbi owa Tunasco Insaat ettaka lino, Minisita omubeezi ow’ensonga za Kampala, Nnaalongo Namugwanya Benny Bugembe ategeezezza nti musiga nsimbi ono agenda kuzimba kuno ekkolero erisunsula emmwaanyi ne kasooli okwongera omuwendo ku bintu ebirimibwa e Mubende okulaba nga bavubuka beeyongera okufuna emirimo wamu n’ okulwanyisa obwavu.
Namugwanya wano wasinzidde n’akalaatira aba Tunasco Insaat A S okukola kyonna ekisoboka okuwa bannamubende emirimo nti kubanga kye kigendererwa ky’e kkolero lino okutekebwawo mu kitundu.
Ye Meeya wa Munisipaali y’e Mubende, Ssekizivu Innocent ategeezezza nti ekkolero lino ligenda kubayamba okusitula ku mutindo gw ‘e bintu ebirimibwa e Mubende era nga muno bagenda okwongera ku kulunda enkoko n’ebisolo nga beeyambisa ebintu ebiva mu kkolero lino.