Ebbago erikwata ku by’ettaka eppya liwedde okubaga nga kati kisigadde eri Minisitule y’ebyettaka okubakana n’eddimu okutalaaga eggwanga nga bebuuza ku Bannayuganda okufuna endowooza zaabwe ku biri mu bbago lino.
Bino byayogeddwa Minista w’ebyettaka, Betty Amongi mu nsisinkano ne Bannamawulire ku Media Centre mu Kampala ng’era okwebuuza ku bantu kutandise leero nga kutandikidde mu Kampala.
Mu bagenda okwebuuzibwako kuliko Bannabyabufuzi, Ab’ebibiina by’obwannakyewa, Bannaddini, ko n’Abakenkufu okuva mu matendekero ag’enjawulo.
Ebikulu ebiri mu bbago lino; mulimu akakiiko k’ebyettaka akapya akatuumiddwa ‘Land Acquisition Tribunal’ nga kagenda kuba katuulibwako abantu 5 okuli; Ssentebe waako, amumyuka Ssentebe, omupunta w’ettaka saako n’abantu abalala 2 nga bano bonna bagenda kuba balondebwanga omukulembeze w’eggwanga oluvanyuma bakakasibwe Palamenti.
Minisita Amongi yannyonnyode nti akakiiko kano akapya akagenda okutondebwawo kaawukanira ddala naako akakulirwa omulamuzi Catherine Bamugemereire olw’ensonga nti kano kagenda kutunuulira ekintu kimu kyokka kyakumalawo ndooliito mu bannanyini ttaka ezireetera Gavumenti okukaluubirizibwa okufuna ettaka ly’eba eyagade lyonna okulikozesa .