Gavumenti ng’eyita mu Minisita omubeezi avunaanyizibwa ku bibiina ebiwozi by’ensimbi, Hon. Haruna Kyeyune Kasolo eragidde ekitongole ekirungamya abawola ensimbi ekya Uganda Microfinance Regulatory Authority (UMRA), obutazza buggya ndagaano za bawozi ba nsimbi (money lender) bonna mu Ggwanga, olw’emivuyo egyetobese mu mulimu gwabwe.
Mininista agamba omwaka guno bafunye nnyo okwemulugunya okuva mu bantu nga kulaga nti bangi ku bawozi b’ensimbi banyaga ssente z’abantu nga bakozesa olukujjukujju kale nga kyetaagisa okusooka okuyimirizaamu mu kuzza endagaano zabwe obuggya.
Okwogera bino Kasolo abadde atongoza enkola y’okulondoola emirimu gy’abawozi b’ensimbi, nga bakozesa emitimbagano eya Online Performance Monitoring Tool PMT, ereeteddwa omukago ogugatta ebibiina ebiwozi by’ensimbi ogwa Association of Microfinance Institutions of Uganda.
Ssenkulu wa Uganda Microfinance Regulatory Authority, Edith Tusubiira ategeezezza nti ekiragiro kya Minisita bagenda ku kiteekesa mu nkola.
Leave a Reply
You must be logged in to post a comment.