Omukulembeze w’ekibiina ekiddukanya omupiira mu ggwanga engineer Moses Magogo, ayanjulidde obwakabaka enteekateeka ey’enjawulo ey’okulaakulanyamu omupiira naddala empaka z’amasaza n’engeri gyegulina okuddukanyizibwamu kisobozese abavujjirizi okugiwagira.
Bino Magogo abyanjulidde Kabineeti ya Kabaka mu Butikkiro e Mengo.
Magogo agambye nti obwakabaka nga bwagala okufuna ekisingawo mu mpaka z’amasaza, bulina okuteekawo enkola esobozesa abavujjirizi okuvaayo okuziwagira nga muno mulimu; okutumbula emikutu mukwanira wala, okuteekawo obukiiko okuviira wansi ku Masaza okutuukira ddala waggulu, wamu n’okufuna abakugu abasobola okuddukanya obulungi omupiira.
Katikkiro asinzidde wano naasaba FUFA efune langi entuufu eza tiimu y’eggwanga okufaananako n’amawanga nga Argentina, Germany n’amalala.
Eno yeemu ku nteekateeka obwakabaka zebulina mu kwongera okutumbula eby’emizannyo nga ne gyebuvuddeko Buganda yawa FUFA ettaka mu bitundu bye Lugazi okuzimbako ekisaawe eky’omulembe.