Eddwaliro ekkulu e Luweero litubidde n’omukyala Margaret Nanyonjo ngali mu myaka nga 70 oluvannyuma lwokutwalibwayo nga afunye akabenje najanjabwa nga 30-December-2023 wabula nga n’okutuusa olwaleero tewabangawo wa luganda lwe ajja kumuddukira.
Bano bagamba nti Nanyonjo okuva lweyaweebwa obujanjabi tewabangayo wa luganda lwe noomu ajja kumuddukira yadde okumukyalira.
Ronald Ssonko nga ye Medical Social officer w’eddwaliro agamba nti bajanjaba Nanyonjo era nga yalina okusiibulwa wabula nti bwebagezaako okumubuuza gyeyava yayogera ebifo ebyenjawulo ebitakwatagana okuli; Matugga, Kawolo Lugazi, n’ebyalo ebirala mu Disitulikiti y’e Buikwe.
Ssonko ayongerako nti ono teyalina kiwandiiko kyonna era nga tajjukira nagyabeera.
Ssonko asabye abayinza okuba nga bamanyi ab’oluganda lwe okubategeeza bagende bamuddukira ku ddwaliro e Luweero.
Nanyonjo bwabadde ayogerako eri Munnamawulire wa URN ategeezezza nti alina aboluganda lwe e Nabbaale ne Nabutti n’abalala e Buikwe wabula tajjukira bweyatuuka mu Ddwaliro e Luweero.