Ekitongole ekivunaanyizibwa ku bigezo mu ggwanga ekya UNEB kifulumizza ebyava mu bigezo by’ekibiina ekyomusanvu mu ttuntu lya leero nga ku luno abayizi bakize ku mwaka guli ogwayita ogwa 2015.
Okusinziira ku bigezo bino ebifulumiziddwa Ssaabawandiisi w’ekitongole kino Daniel Odongo mu Yafeesi ya Ssaabaminisita, abayizi ab’obulenzi bakize ku b’obuwala. Daniel Odongo agamba nti abayizi basinze kukola ssomo lya SST, neriddirirwa Olungereza, Ssaayansi awo okubala nekuddako.
Wabula ebigezo bya abayizi 1886 bikwatiddwa oluvannyuma lw’okwenyigira mu kubba ebigezo.
Ssaabawandiisi agamba nti ebiva mu bigezo biraga nti , amasomero g’obwannannyini gakoze bulungi okusinga aga Gavumenti (UPE) ate era nga agoomubibuga gasinze agoomubyalo.