Abavubuka okuva mu Kibiina kya National Unity Platform nga bakulembeddwamu Moses Bigirwa balabiddwako nga bayonja oluggya lw’olubiri lw’e Budhumbula, nga kino kye kitebe ky’e Bugabula era amaka amatongole aga Kyabazinga William Wilberforce Kadhumbula Gabula Nadiope IV.

Akulira oludda oluwabula Gavumenti Hon. Mathias Mpuuga Nsamba avuddeyo nategeeza nti okulabulwa okwakoleddwa Sipiika Anitah Among ngabatiisatiisa okubagoba singa banamala entuula 15 ezomuddiringanwa nga tebalabiseeko mu Palamenti, kyakukwata Baminisita nga Kahinda Otafiire, si Babaka ba ludda luvuganya kuba obutabaawo bwabwe babukola mu buwandiike eri Palamenti.

Mu kwetegekera embaga ya Kyabazinga William Nadiope Gabuala IV egenda okubaayo olunaku lw’enkya, Uganda Police Force erambise enkozesa y’enguudo egenda okugobererwa. Aduumira Poliisi y’ebidduka mu kibuga Jinja, Joachim Baluku ategeezezza nti olw’ebyokwerinda bya Pulezidenti Yoweri Kaguta Museveni n’ebyabagole, oluguudo oluva e Jinja okudda e Busia lugenda kuggalwa.
Pulezidenti n’abagole bajja kukozesa luguudo oluyitibwa Cathedral Road nga luno terugenda kukkirizibwako mmotoka ndala yonna so ng’ate enguudo ezimu ezegatta ku kkubo eddene nazo zijja kuba nzigale.
Ku zino kuliko oluguudo oluyitibwa Katende nolw’e Kamuli oludda ku Lubiri. Okusinziira ku Baluku, abakungu bajja kukozesa luguudo lwa Katende bagende mu Lubiri, gyebanasanga baasi za Kiira Motors ezigenda okubatwala ku kkanisa n’okubazza.

Olubiri lw’e Budhumbula, ekitebe ekikulu eky’e Bugabula nga ge maka ga Kyabazinga William Wilberforce Kadhumbula Gabula Nadiope IV amatongole.
Mu maka muno Kyabazinga mwasuubirwa okusula olwaleero wanaava olunaku lw’enkya okwolekera embaga.