Olwaleero Kkooti y’ensi yonna ewozesa bakalintalo mu kibuga Gulu lw’egenda okusomera eyali omuduumizi mu kabinja k’abayeekera ba LRA akakulirwa Joseph Kony, Thomas Kwoyelo emisango 78 egivunaanibwa. Kino kiddiridde Kkooti eno olunaku lw’eggulo okukakasa nti Kwoyelo alina okwewozaako oluvannyuma lw’omuwaabi wa Gavumenti okuleeta obujulizi obulaga nti asaanidde okuvunaanibwa emisango egyo wabula egimu baagimuggyeko kubanga yabadde wakuvunaanibwa emisango 93. Thomas Kwoyelo avunaanibwa emisango egirimu okumenya amateeka agali ku ddaala ly’ensi yonna nga mwemuli n’okutyoboola eddembe ly’obuntu.

Ab’enju ya Kalya ngabekobaanye n’abamu ku b’obuyinza mu disitulikiti ye Kayunga balumbye Embuga y’eggombolola Mumyuka – Kayunga nebakuula emiti egibadde gyasimbibwa abantu ba Kabaka okuteekateeka oluggya lw’eggombolola eno nga bagamba nti ettaka ly’eggombolola balirinako akakwate. Bano bakubye amasasi era bagezezzaako n’okuwamba Omwami w’Omuluka Muusaale Namagabi Mw.Katumba Godfrey era mu kavuvungano kano baamukase okutuula wansi naye abantu nebamununula gyebyaggweredde nga abatamanya ngamba bano bemuludde ne badduka. Oluvannyuma lw’embeera eno eyabaddewo olunaku lw’eggulo, abantu ba Ssaabasajja baasuze ku Mbuga y’eggombolola nga balinze abalumbaganyi bano era ne gyebuli eno bakyagumbye mu kifo okulaba addamu okutabaala Embuga ya Beene.