Uganda Police Force ng’ekolera ku biragiro by’omumyuuka wa Kaliisoliiso wa Gavumenti Anne Twino Atuhairwe ekutte abasawo 2 okuva mu Ddwaliro ly’e Kassanda lwa bulyake.
Abakwatiddwa kuliko Edward Lugasa ne Joelia Nakabute abakola mu kkeberero ly’omusaayi mu Ddwaliro eryo. Bano baggaliddwa ku Poliisi e Kassanda.

Abatuuze abawerako bagaddewo amadduuka gaabwe nebaabulira akattawuni ka Kyitehurizi mu Disitulikiti y’e Kamwenge oluvannyuma lwabagambibwa okubeera abayeekera ba ADF okulumba ekitundu kino mu ttumbi nga bukya ku lwokubiri nebatta abantu 10.

Akulira oludda oluvuganya Gavumenti mu Palamenti Munnakibiina kya National Unity Platform Hon. Mathias Mpuuga Nsamba avuddeyo nategeeza nti mwetegefu okuva mu kifo kino singa bakama be basalawo okulonda omulala amuddire mu bigere. Owek. Mpuuga bino abyogeredde mu lukiiko lwa Bannamawulire lwakubye olwaleero bwabadde ayogera ku bibadde mu mwaka n’engeri gyebatambuddemu.

Minisita omubeezi avunaanyizibwa kukulungamya Eggwanga Kabbyanga Godfrey Baluku avuddeyo nategeeza Bannamawulire nti Paddy Sserunjogi aka Sobi eyatiddwa nti tabadde mukozi wa Gavumenti.
Ono ategeezezza nti buli mukozi wa Gavumenti ya Uganda alina ID era nekinyonyola omulimu gwakola mu Gavumenti.

Sipiika wa Palamenti Nnaalongo Anitah Among alagidde ekitongole ekivunaanyizibwa ku kibuga Kampala ekya Kampala Capital City Authority – KCCA okuteekayo okusaba okusasula omugagga Muwonge Johnbosco nnannyini ttaka okutudde akatale k’abatembeeyi aka Smart City akasangibwa ku Ggwanda ng’omugagga ono abadde aweze okugobawo abatembeeyi bano lwa Gavumenti butamusasula.
Omugagga Muwonge agamba kati omwaka mulamba nga bamusuubiza malusu kyokka nga asasula amazzi n’amasanyalaze naye nga buli wagenda mu KCCA okubanja ssente ze badda mu kumwetolooza.

Olwaleero Kkooti y’ensi yonna ewozesa bakalintalo mu kibuga Gulu lw’egenda okusomera eyali omuduumizi mu kabinja k’abayeekera ba LRA akakulirwa Joseph Kony, Thomas Kwoyelo emisango 78 egivunaanibwa. Kino kiddiridde Kkooti eno olunaku lw’eggulo okukakasa nti Kwoyelo alina okwewozaako oluvannyuma lw’omuwaabi wa Gavumenti okuleeta obujulizi obulaga nti asaanidde okuvunaanibwa emisango egyo wabula egimu baagimuggyeko kubanga yabadde wakuvunaanibwa emisango 93. Thomas Kwoyelo avunaanibwa emisango egirimu okumenya amateeka agali ku ddaala ly’ensi yonna nga mwemuli n’okutyoboola eddembe ly’obuntu.