Abaana abatalina mwasirizi abava mu maka agatesobola 550 mu Disitulikiti y’e Nakaseke baddukiriddwa n’ebintu ebikozesebwa mu bulamu obwabulijjo wamu nebyo ebikozesebwa mu masomero. Kit 550 zezagabiddwa nga buli kit erimu omufaliso, uniform, ebbaafu, amasuuka, akatimba k’ensiri, bulangiti, ensawo y’essomero, engatto, ebitabo, eccupa y’amazzi n’ebirala babyeyambise nga basoma okwanguyirwa obulamu bw’essomero nga bafuna n’otulo otumala bwebabeera bazzeeyo ewaka oluvannyuma lw’essomero.
Abaana bano baggyiddwa mu maka 550 okuva mu magombolola ag’enjawulo agasangibwa mu Nakaseke omuli Ssemuto, Kapeeka, Kiwoko, Kikamulo, Kito, Kinoni, Butalangu, Wakyato, Kasangombe ne Nakaseke.
Bino byonna, byawomeddwamu omutwe Esther Nakawooya nga ayambibwako mukwano gye okuva mu bitongole eby’obwannakyewa omuli; Inner Wheel Kampala ekitwalibwa aba Inner Wheel International wamu n’aba Sleeping Children Around the World (SCAW) okuva e Canada.