Omubaka akiikirira Mityana Municipality mu lukiiko olukulu olw’Eggwanga MP Zaake Francis Butebi asindikiddwa ku alimanda mu kkomera lya Gulu Central Prison e Gulu ku misango gy’okulya mu nsi ye olukwe. Omulamuzi omukulu Isaac Kintu yasindise Zaake ku alimanda okutuuka nga 14 – March lwanadda mu kkooti okusomerwa emisango egimuvunaanibwa.
Munnamateeka we Henry Komakech Kilama ategeezezza nti agenda kuwaayo okusaba kw’omuntu we okweyimirirwa ku Monday nga 25 – Feb – 2019.
Omubaka Zaake ayongeddwa ku balala 35 okuli n’omubaka wa Kyaddondo East Robert Kyagulanyi Ssentamu aka Bobi Wine wamu n’ababaka era n’abantu abalala.
Bano bavunaanibwa okukuba emotoka y’omukulembeze w’eggwanga Yoweri Kaguta Museveni nga 13 – August – 2018 mukunoonya akalulu ka Arua Municipality.

Akakiiko ka Palamenti akavunaanyizibwa ku kulondoola emirimu gy’ebitongole bya Gavumenti aka Committee on Commissions, Statutory Authorities and State Enterprises (COSASE) mu Alipoota yaako gyekaakoze bwekatyo kegyeerezza eyali Executive Director Bank Supervision Justine Bagyenda ku bigambibwa nti yezza kubimu ku by’obuggaga wamu n’ebintu ebyali ebya Bbanka 7 ezaggalwa.

Ekitongole kya Poliisi ya Yuganda ekitegulula bbomu etuntu lyaleero kisazeeko enguudo zonna ezoolekera Constitutional square oluvannyuma lw’omuntu atanategeerekeka okusuulawo Suit Case, wabula mukugibikkula nebasangamu engoye n’ebiwandiiko.

Enkya ya leero Katikkiro wa Buganda Charles Peter Mayiga alambudde emirimu egigenda mu maaso ku Masiro e Kasubi n’ekigendererwa eky’okufuna ekifaananyi ekituufu kaweefube w’okuddaabiriza ennyumba Muzibwazalampanga watuuse.

Bwabadde alambula, Katikkiro akinogaanyizza nti Okuzimba Muzibwazalampanga tekiringa kuzimba nnyumba ya bulijjo olw’emisoso egirina okugobererwa.

Omubaka wa Kassanda South, Simeo Nsubuga n’owa Mityana South; Henry Kamya Makumbi basabye Palamenti okubawa obuyinza bakole ennoongosereza mu tteeka ly’ettaka naddala mu kawaayiro 32(a) k’ebyettaka .
Nsubuga yategeezezza nti amyuka sipiika wa Palamenti, Jacob Oulanyah yabasabye okukwatagana ne Minisitule evunaanyizibwa ku by’ettaka okulaba nga batuuka ku nzikiriziganya mu nnongosereza zino bw’atyo n’abawa ennaku 45 okudda eri Palamenti okubategeeza ekituukiddwako ku nsonga eno.
Mu lukung’aana lw’abaamawulire olutuuziddwa ku Palamenti, Simeo Nsubuga ategeezezza nti bannannyini ttaka abasinga babadde basusse okukijjanya n’okusengula abeebibanja n’abatuuze nga beekwasa nga bwe balemeddwa okubasasula obusuulu n’agamba nti wabula kizuuliddwa ng’abasinga ku bo ensimbi zino bazigaana ne badda mu kwebuzabuza n’ekigendererwa okugobaganya abeebibanja ku ttaka.

Akulira akakiiko k’ebyettaka e Masaka Jamillah Lunkuse apondoose n’alabikako mu kkooti ento e Lwengo oluvannyuma lw’omulamuzi w’eddaala erisooka; Abdu Erias Kaiza okumuwa nsalessale eyawedde,ko eggulo nga 20/02/2019 ng’amulagira okuleeta ebiwandiiko n’ekyapa kwe baaweera maneja wa KT Musa Kavuma ettaka lya Gavumenti ku bwereere ate ye n’amala n’aliguza Rev.John Kalagiro kw’asengula abantu.
Lunkuse amaze enfunda eziwera nga yeebulankanya okulabikako mu kkooti eno nga naye awera nga bw’atajja kulinnya mu kkooti eno kuba omusango ogwogerwako tagumanyi era ne kkooti ento terina buyinza bumuwozesa.
Ono yatuuyanidde mu kaguli ka kkooti bannamateeka ku njuyi zombiriri okuli abali ku ludda lw’abawawaabirwa; Appolo Kwesiga eyakiikiridde Hon. Ssegona okuva mu kampuni ya Lukwago and Advocates nga bamusoya ebibuuzo okulaga kkooti ebiwandiiko n’ekyapa kwe baaweera Musa Kavuma ettaka lino.
Lunkuse yasoose kusaba omulamuzi Kaiza agobe ab’amawulire mu kkooti eno ekitasobose olwo n’akabatema nti ebiwandiiko byamubulako nga n’ekyapa omulamuzi kye yamutuma takireese.
Kino kiggye omulamuzi Kaiza mu mbeera n’amukunya oba ddala yaliwo ng’ettaka
lino likubibwa n’addamu nti ye talinnyangayo yadde ekigere kuba ogw’okupunta si mulimu gwe. Wabula Lunkuse akakasizza kkooti nti Kavuma yaweebwa ettaka lya yiika 200 kyokka ng’eririko enkaayana liri yiika 280. Omulamuzi Kaiza omusango yagwongeddeyo okutuusa nga 10/April/2019.

Waliwo ababaka ba National Resistance Movement – NRM okuli John Baptist Nambeshe abagenda okwekubira enduulu mu kkooti etaputa Ssemateeka nga bawakanya eky’olukiiko olufuzi olwa CEC mu NRM okusemba Pulezidenti Yoweri Kaguta Museveni okwesimbawo nga tavuganyiziddwa mu kamyufu k’ekibiina. Bano bagamba nti kati olwo NRM ebeera efuuse Bwakabaka obuwedde emirimu.
Bano bagamba nti ekyakoleddwa CEC kityoboola Ssemateeka w’eggwanga n’okulemesa abalala abandyagadde okwesimbawo mu kibiina ku kifo ky’omukulembeze w’eggwanga.

Omulangira David Wasajja avumiridde enneeyisa y’omumyuka wa Ssaabawolereza wa Gavumenti Mwesigwa Rukutana eyamukaayukidde bweyabadde alabiseeeko mu kakiiko akanoonyereza ku mivuyo gy’ettaka. Omulangira asabye akakiiko nti kaanike yenna eyeeyisa mu ngeri etajja.

Poliisi nga eri wamu n’abekitongole ky’ebyebibira mu Ggwanga ekya National Forest Authority (NFA) bakutte abantu mukaaga abaasangiddwa nga balima mu kibira kya Mpanga Forest Reserve mu Mpigi Town Council ne baggalirwa lwa kusaanyawo kibira kino ekimu kyokka ekibadde kisigaddewo mu Mpigi, Butambala ne Gomba.
Bano kuliko Leonald Ssekitoleko 70, Robert Kimbuseeko 35, Muhamad Sserule 58, Emmanuel Sseruga 29, nga bonna batuuze b’e Nseke ne Night Namusoke 40, ne Prossy Nakubulwa 27, nga bano b’e Mpambire nga bakwatiddwa lubona nga balima mu kibira Mpanga ku kyalo Nseke.
Okusinziira ku avunaanyizibwa ku bibira mu kitundu kino, Hope Twikiriza, agamba nti abakwate babadde baasaanyizzaawo ekitundu ky’ekibira kino n’ettundutundu ly’olutobazzi olusemberedde ekibira nga beekweka mu kusimba emiti gya kalittunsi.
Yagambye nti abadde amaze ebbanga ng’alinnya akagere abantu bano kyokka nga bwe bagendayo okubakwata nga badduka ekimuwalirizza okukola ekikwekweto ne poliisi.
Abaakwatiddwa bakira balumiriza abakungu ba NFA okutunda ekibira nga bakiguza abagagga ne basimba emiti gya kalittunsi nga bano be babawadde olukusa okulima mu kalitunsi waabwe emmere y’okulya okutuusa nga kalitunsi akuze.
Akulira poliisi ye Mpigi, Erias Twesigye yagambye nti abakwate baaguddwaako omusango gw’okusanyawo ekibira kya gavumenti ku fayiro nnamba SD; 51/18/02/19 era baakutwalibwa mu kooti bavunaanibwe.