Omulamuzi wa Kkooti ya Buganda Road Jalia Basajjabalaba olunaku olwaleero asindise ku alimanda omuvubuka Mubaraka Sharayimu aka Musiraamu Mudandiri 24 ku alimanda mu kkomera e Luzira okutuusa nga 21 – August nga kigambibwa nti ono yali omu ku kibinja ky’ababbi abalumba Munnansi wa Buyindi ku ESO Corner mu Kampala nebamubkuba wamu n’okumubbako ebintu bye.
Mubaraka nga mutuuze mu Nsooba Zone okuliraana Kalerwe yakwatibwa kkamera enkettabikolwa ngakuba Joshi Keshav namubbako ensawo omwali Laptop, ssente enkalu emitwalo 15, charger n’ebisumuluzo nga byonna bibalirirwamu obukadde 2 n’ekitundu.
Oludda oluwaabi lugamba nti Mubaraka yakozesa ejjambiya okuzza omusango guno nga 15-July-2024. Ono takiriziddwa kwewozaako kuba omusango gweyazza gwa nnaggomola nga guwulirwa Kkooti Enkulu yokka.
Uganda Police Force egamba nti ekyayigga banne bwebazza omusango guno.
Bya Christina Nabatanzi
#ffemmwemmweffe

Waliwo ekibinja ky’abantu okuva mu Disitulikiti y’e Butaleja abeyiye ku nguudo okwaniriza Omubaka wa Bunyole East, Yusuf Mutembuli nga bamukirisa okuva mu kkomera e Luzira gyabadde ku alimanda kumpi okumala emyezi 2 ku misango egyekuusa ku buli bw’enguzi. Mutembuli n’Ababaka abalala okuli; Paul Akamba owa Busiki County n’Omubaka omukyala owa Disitulikiti y’e Lwengo Cissy Dionizia Namujju bakwatibwa ku bigambibwa nti baali bagezaako okusaba enguzi ya bitundu 20 ku 100 okuva ku mbalirira y’Akakiiko akalera eddembe lyobuntu aka Uganda Human Rights Commission – UHRC.

#ffemmwemmweffe

Omwogezi wa Uganda Police Force Kituuma Rusoke avuddeyo nategeeza nti nga 3-August-2024 ku ssaawa musanvu n’eddakiika 50 ezookumakya bafuna lipooti nti waliwo omuntu eyali atiddwa ku luguudo lwa Kitooro to Entebe International Airport. Omugenzi yategeerekeka nti ye Ngorok John Bosco, 30 nga mukozi ne Uganda Revenue Authority (URA) Domestic Tax Department. Ono yali afumitiddwa mu bulago ne ku mutwe omuntu atanategeerekeka.
Ngorok yaddusibwa Poliisi mu Ddwaliro lya Grade B wabula nebabategeeza nti yali afudde oluvannyuma lw’eddakiika 20. Poliisi yatandikirawo okukola okunoonyereza nekwata Dominic Alinga, nga ffaaza wa Irir e Nakapiripirit. Alinga abadde yagobwa okuva mu Church, nga Bishop yali amulanga kubba kiweebwayo ekiweza obukadde 6.
Poliisi etandise okunoonyereza ku mukono gwa Alinga mu ttemu lino.

#ffemmwemmweffe