Abraham Kalanzi 31, nannyini kizembe ekyaggwa nekitta abantu 13 mu zzooni y’e Kiwempe mu Makindye yasimbiddwa mu maaso g’omulamuzi wa Kkooti y’e Makindye ow’Eddaala erisooka Edith Mbabazi wamu ne Engineer Christopher Bandi Ruhambya 55 basomeddwa emisango okuli okuzimba ekizimbe nga tebalina lukusa, okuviirako akabenje wamu n’okugaana okugoberera ekiragiro ekyali kibayimiriza okuzimba mu December 2019.
Bano baguddwako emisango 19, wabula emisango byagyegaanye era nebateebwa ku kakalu ka Kkooti. Nga bayita mu Bannamateeka baawe okuli Anthony Wameli ne Rodgers Muhumuza bano basabye beyimirirwe, nga Wameli yategeezezza nga nti emyaka gyalina akuze ate nga alina n’ekirwadde ekimubala embiriizi ekitamusobozesa kubeera mu kkomera.
Bano baleese ababeyimirira nga Kalanzi yaleese mukazi we Flavia Nakasaga, John Paul Tumukunde nga Accountant wa Salova International Builders Uganda limited ate y’e Ruhambya yaleese muganda we era omusuubuzi Edward Atugonza ne John Ssimbwa eyaliko omubaka.
Bano bateereddwa ku kakalu ka Kkooti kakadde kamu n’ekitundu akobuliwo.

#EbirwaByerabirwa:
Bwerwali bweruti nga May 26, 1966 Kabaka wa Buganda mu biseera ebyo Sir Edward Frederick William David Walugembe Mutebi Luwangula Muteesa II nawanganguka oluvannyuma lw’okutoloka mu Lubiri lwe nag lulumbiddwa Abasirikale abaali baduumirwa Idi Amin Dada Oumee ku biragiro bya Pulezidenti Apollo Milton Obote nga bagamba nti Olubiri mwalimu ebyokulwanyisa.
Kino kyaleetawo olutalo sinziggu wakati w’eggye erikuuma Kabaka wamu n’Amaggye. Webalumbira Olubiri nga 24-May Kabaka yalimu mu Lubiri wabula yatoloka nayita e Burundi bwatyo nayolekera ekibuga London mu Bungereza.

Minisitule y’Ebyenjigiriza evuddeyo neragira Bannanyini wamu n’Abakulira Amasomero naddala agobwannanyini okuvaayo basasule Abakozi bonna mu masomero omusaala gwabwe omujjuvu ogw’emyeezi gya ttaamu esooka kuba Amasomero webagagambira okuggalawo gaali gakoze embalirira nga balina okusasula abasomesa n’abakozi alabala nga balinawo n’ensimbi zebakungaanyizza. Ejjukizza nti ne Gavumenti esasula Abakozi baayo.

Uganda Police Force evuddeyo nejjukiza abantu ebiragiro ku motoka ez’obwannanyini ezigenda okuddamu okutambula olunaku lw’enkya;
Zino zirina kubeeramu abantu 3 bokka nga ne Ddereeva omubaliddeko nga bewadde ebbanga, bonna balina okubeera ne mask.
Teri motoka ekirizibwa kusala nsalo.
Muweebwa amagezi okubeera ne Sanitizer mu motoka zammwe, zirina okubeera nga zoozebwa mubudde okuzikuuma nga nnyonjo.
Mwandibadde mwewala okukozesa AC, era nga temulina kutambulira mu budde bwa curfew. Abo bonna abanakwatibwa nga bamenya amateeka bakuwa engasi, emotoka okusikibwa, n’okukwatibwa ne batwalibwa mu Kkooti.

Yuganda yandiba nga eyolekedde ebbula ly’amafuta oluvannyuma lwa ba Ddereeva ba Loole e Kenya okwekumamu ogutaaka nebaziba eekubo ku ludda lwa Kenya okuva ku lunaku olw’okuna lwa wiiki ewedde nga kati akalippaggano akaweereza ddala kiromita 50 ak’emotoka ennene katandikira ku nsalo y’e Malaba. Bannakenya bawakanya ekyokuddamu okukeberebwa so nga bava ewaabwe nga bakebereddwa ekirwadde kya #COVID-19.

#SimbaSportsUpdates;
Kitalo!
Eyaliko Omuduumizi wa Ttiimu y’Eggwanga Uganda Cranes Jimmy Kirunda 70, afudde. Ono yetaba mu emirundi 5 mu Africa Cup of Nations Qualifier, era nga yaduumira Uganda Cranes mu ‘tournament’ 3. Yaliko Manager wa Uganda Cranes wakati wa 1989 okutuusa 1996.

Minisitule y’Ebyobulamu evuddeyo netegeeza ng’Abantu abalala 14 bwebazuuliddwa n’ekirwadde kya #COVID19UG. Kati abakakwatibwa obulwadde bwa #COVID-19 mu Yuganda bali 212. Egamba nti bano bonna basisinkanako ba Ddereeva abakakasibwa okubeera n’obulwadde buno.
Bano bonna babadde mu ‘quarantine’. Ba Ddereeva 5 abasangiddwa n’obulwadde buno nga bonna Bannansi ba Tanzania baziddwayo ewabwe.

Omwogezi wa Uganda Police Force mu Kampala Metropolitan Police Patrick Onyango avuddeyo ku mukutu ogwa twitter; “Ddereeva w’emotoka nnamba UAS 597U Toyota RAV 4, watomedde omusirikale wa Traffic e Namanve ku luguudo oluva e Kampala okudda e Jinja notayimirira olunaku lw’eggulo ku ssaawa emu n’edakiika abiri ez’ekiro. Osabibwa okugenda ku Poliisi yonna ekuli okumpi”

Uganda Police Force mu bitundu by’e Mityana ekutte abantu 4 nezuula n’emmundu. Ekibinja okuva mu kitingole kya Poliisi ekirwanyisa obuzigu bw’emmundu okuva mu ttundutundu ly’e Wamala oluvannyuma lw’okutemezebwako bakoze ekikwekweto mwebakwatidde abagambibwa okubeera ababbi ku kyalo Busimbi e Mityana nga bano basangiddwa n’emmundu nga erimu amasasi 5.

ASP Kawala Rachel
Wamala Region PRO