Pulezidenti wa Forum for Democratic Change Patrick Oboi Amuriat: “Ensonga zokufuna ssente mu kibiina okuva ewa Museveni zaaleetebwa omutandisi w’ekibiina Pulezidenti Kizza Besigye mu 2020 mu kyaama. Yatugamba nti yali afunye amawulire nti waliwo ssente ezaleetebwa mu kibiina okuva ewa Museveni. Kitutwalidde emyaka 2 nga tugezaako okugonjoola ensonga eno mu kyaama wabula netulemererwa.”

Ssaabawandiisi wa Forum for Democratic Change Nathan Nandala – Mafabi: “Hon. Ssemujju, Erias Lukwago nekibinja kyabwe bavuddeyo nebategeeza nti twafuna ssente okuva ewa Mw. Yoweri Kaguta Museveni okulwanyisa National Unity Platform NUP. Lwaki Omwogezi wa FDC ate yayogerera NUP! Kino kyongera okukakasa nti si Bannakibiina kya FDC. Batudde butuuze mu bifo ebinene naye nga Bammemba ba NUP. Y’ensonga lwaki mu kalulu akawedde Lukwago yali asaasira nnyo NUP n’ebiwayi ebirala okusinga FDC. NUP bweba erina okwemulugunya kwonna, wetuli era tuli betegefu okwenyonyolako.”

Ssaabawandiisi wa Forum for Democratic Change FDC Nathan Nandala – Mafabi: “Hon Ibrahim Ssemujju n’abalala baliko ebigambo byebayogedde nga bagamba nti nakola ddiru ne Museveni okumuguza FDC ampe obwa Gavana bwa Bbanka enkulu oba Minisitule y’Ebyensimbi. Ebiboozi bino bibaddewo okuva mu 2012. Tewali wano asobola kubuusabuusa bumanyi bwange! Nina obusobozi okukola emirimu egyo naye sirina bwetaavu kukolera Yoweri Kaguta Museveni, bino babikola kwenoonyeza byabwe. Hon. Ssemujju yakyasinze okufuna mu Gavumenti ya Yoweri Kaguta Museveni. Nina obujulizi obulaga nti naye akozesa ba famire ye bokka, mu mugambe aleete olukalala lw’abakozi be.”

Pulezidenti wa Forum for Democratic Change Patrick Oboi Amuriat wamu ne Ssaabawandiisa Nathan Nandala – Mafabi mu lukiiko lwa Bannamawulire lwebatuuzizza bavuddeyo nebategeeza nga bwebategenda kwasanguza ani abateekamu ssente kuba ayinza okubeera mu Gavumenti, abasuubuzi oba abakozi ba Gavumenti. Tukikola kubakuuma omusibira mu bbwa aleme kubatuusaako buzibu.
Amuriat alumbye Besigye nategeeza nti ku bbo tewali yali abaddeko mu NRA kuba ye yali musawo wa Pulezidenti Museveni mu biseera by’olutalo.
Amuriat ategeezezza bammemba bonna aba FDC abayinza okuba n’obumulumulu bwonna ku bukulembeze n’engeri ekibiina gye kiddukanyizibwa okweyambisa offiisi ezenjawulo mu kibiina okugonjoola ensonga ezo.
Amuriat agamba nti ye ne Nandala si Bannabyabufuzi bakiseera buseera, babaddewo ebbanga lyonna nga balwanyisa nakyemmalira. Bano bagamba nti kiruma oli okuvaayo nagamba nti baalya mu FDC olukwe era baagala kugiguza Pulezidenti Yoweri Kaguta Museveni ekitasoboka.

Wabaluseewo obutakkaanya munda mu Kibiina kya Forum for Democratic Change, abakulembeze baakyo bwe betemyeemu ng’ekiwayi ekimu ekikulemberwa Pulezidenti w’ekibiina Patrick Oboi Amuriat ekirala nga kikulemberwa omwogezi w’ekibiina Ibrahim Ssemujju Nganda ne Loodi mmeeya era Omumyuuka wa Pulezidenti owa Buganda Erias Lukwago.
Ekiwayi kya Ssemujju kirumiriza ekiwayi ekikulemberwa Pulezidenti w’ekibiina Amuriat ne Ssaabawandiisi, Nandala Mafaabi okufuna ssente ezitamanyiddwako mayitire nebazireeta mu kibiina kyokka bwe baabateeka ku nninga okunnyonnyola gyezaava nebeerema.
Ssemujju asinzidde mu lukungaana lwebakubye ku Nsambya Sharing Hall mu Kampala okwebuuza ku Bannakibiina ku kiki kyebaba bazaako naategeeza nti ekimala kimala tagenda kwenyigira mu kintu kyonna kigenda kutondawo bukulembeze bwefaananyirizaako obwa Mao ngekigendererwa kyakuwaayo kibiina wa Pulezidenti Museveni.

Okunoonyereza ku mivuyo egyetobeka mu kalulu ka LC5 e Bukedea kukyagenda mu maaso, era olunaku olwaleero Akakiiko akalwanyisa obuli bw’enguzi n’obukenuzi aka Anti Corruption Unit – State House Uganda nga kakolera wamu ne Uganda Police Force katutte RDC wa Bukedea Tukei Wilberforce ne DPC wa Bukedea SP Charles Okoto mu kkooti nebavunaanibwa emisango okuli okwekobaana okuzza omusango nebasindikibwa ku alimanda okutuusa nga 26/07/2023.

Minisita avunaanyizibwa ku z’ettaka, amayumba n’okuteekerateekera ebibuga Judith Nabakooba avuddeyo nasaba Bannayuganda okukozesa omukisa gwa Pulojekiti empya eya Competitiveness and Enterprise Development Project – CEDP eyamba Bannayuganda kati okufuna ebyapa mu bitundu byabwe.
Minisita ategeezezza nti wansi Project eno basobodde okuggulawo Zonal Land Offices 22 era nga zateekeddwamu buli kimu ekikwatagana n’ebyettaka ezibayamba okugoba ku byapa, okusomesa Abantu ku by’ettaka wamu n’okugonjoola ensonga z’ettaka.