Bannamateeka Abasiraamu abegattira mu kibiina kyabwe ekya @Uganda Muslim Lawyers Association batutte Mufti wa Uganda Sheikh Ramadhan Mubajje n’omusuubuzi Justus Kyabahwa, mu Kkooti nga babalanga obukenuzi wamu n’okutunda ebintu by’Obusiraamu mu lukujjukujju. Baagala Kkooti esazeemu endagaano yokutunda ettaka eyakolebwa wakati wa Mubajje ne Kyabahwa.

Sipiika wa Palamenti Nnaalongo Anitah Among asisinkanye akulira akakiiko akalera eddembe ly’obuntu aka Uganda Human Rights Commission – UHRC, Mariam Wangadya mu maaso g’akulira oludda oluwabula Gavumenti, Hon Mathias Mpuuga Nsamba, Commissioner Hon. Solomon Silwany ne Hon. Abed Bwanika okulaba engeri gyebasobola okusisinkanamu abakulu mu Minisitule n’ebitongole ebikwatibwako ensonga z’ebyokwerinda ku nsonga z’abantu abagambibwa okubuzibwawo wamu n’eddembe ly’obuntu mu Ggwanga.

Pulezidenti Yoweri Kaguta Museveni; “Abagwiira abamu bagezaako okututeekako puleesa nga bagamba nti bwetutakola kino, tebajja kutukiriza kugenga mu Amerika. Nze saagala kugenda mu Amerika. Okugenda mu Amerika, mbeera nnyamba Bamerika, kuba buli kimu nkirina wano sirina kyenjula.”

Palamenti yategeezeddwa nga Uganda Police Force bweyagula embwa 10 okuva ebweru w’eggwanga mu mwaka 2022/23, nga zazaala era embwa 30 kuzazaalibwa zitendekebwa okukonga olusu. Mu January wa 2023 Poliisi yasaba obuwumbi 4 mu obukadde 968 okugula embwa 750 okugaziya ku kitongole kyaayo ekyembwa okusobola okulwanyisa obumenyi bw’amateeka.

Abasirikale ba Uganda Police Force bakwatiddwa ku katambi nga bagezaako okukkakanya Abavubuka ababadde bakungaanye ku kisaawe ky’e Kizinda mu Disitulikiti y’e Bushenyi ababadde balwanira obusawo bwebigimusa obuwandiikiddwako Office of The National Chairman NRM ku mukolo gw’abavubuka. Pulezidenti Yoweri Kaguta Museveni nga ye ssentebe wa National Resistance Movement – NRM yagambibwa okubatonera ebigimusa bino.