Wabaddewo akasattiro mu batuuze mu Disitulikiti y’e Budaka abatuuze bwebatandise okutema emiti  gyabwe egy’emivule olw’amawulire agabadde gatandise okuyitingana nti Gavumenti eteekateeka okweddiza emiti gino wonna mu ggwanga. 

Ekibaddewo, ebigambo bibadde bitandise okuyitingana nti Gavumenti egenda kukuba ”Stamp” ku mivule n’emigavu era yeddize obwannannyini ku gyo era nga tegenda kukkiriza muntu yenna kugitema newankubadde giri mu kibanja kye.

Nabwekityo abantu kwekubaguka nebatandika okutema emikulu n’emito .

Omubaka wa Munisipaali ye Masaka Mathias Mpuuga Nsamba yennyamidde embeera abavubuka ab’omulembe guno gye beeyisaamu,  nategeezza nga bw’ali omwetegefu okuwagira ebbago ly’etteeka ku mwenge n’agamba nti abavubuka bangi boonoonese nga kino siwakukikkiriza.

Mpuuga agamba nti abavubuka abandikedde okubaako kyebeekolera, bakeera kunywa mwenge kyokka nga ekyennyamiza gulimu ebika eby’enjawulo nga kino kireetedde bangi n’okugwa edddalu.

Omubaka okwogera bino abadde ku mukolo ogumu nga Gavumenti eyita mu kitongole ekitakabanira okukuuma  obutonde bw’ensi ku nnyanja Nalubaale ekya Lake Victoria Environment Project (LAVEMP)etongoza okuzimba kaabuyonjo ku myalo egiri mu disitulikiti y’e Kalungu n’ebifo ebikungaanya abantu abangi.

Omukozi w’awaka (House Maid) Jemima Nasifah eyeeyita Tumukunde Zainabu,  nga nzaalwa y’e Rwanda  yeyasimbiddwa mu kkooti ento eyooku City Hall mu Kampala ku maaso g’omulamuzi Esther Nahirya  n’avunaanibwa omusango gw’okusiiga omwana wa myaka ebiri obulwaddde bw’akawuka ka mukenenya. 

Oluuyi oluwaabi nga lukulemberwamu Jackie Kyasimire lwategeezezza kkooti nti Jemima Nasifa omukomba bokisi ono, wakati w’ennaku z’omwezi 30 Ssebaaseka ne 3 Kasambula omwaka guno mu bitundu by’e Kiwaatule mu zzooni y’e Kazinga mu Kampala,  ng’akimanyi bulungi nti alina akawuka ka mukenenya,  yasala ku ku mukono gwe ogwa ddyo, n’afuna omusaayi bwatyo n’agusiiga ku kiwundu omwana ono kyeyalina ku nnyindo.

Kyasimire yategeezezza kkooti nti Jamima yakwatibwa lubona mu kikolwa  nnyina w’omwana ono oluvannyuma lw’okuwulira nga omwana we akaaba. Wabula Jamima yeegaanye era n’asindikibwa ku alimanda e Luzira.  

Abantu abawerako abalina emisango mu kkooti e Mubende olwaleero basiibye bakonkomadde ebweru wa kkooti, emisango gyabwe obutawulirwa olw’akeediimo k’abawaabi ba  Gavumenti akatandise olwaleero.

Abawaabi ba Gavumenti baagaana okukola olunaku  olwaleero  olw’ensimbi zibafuna entono nebagamba nti bo bawulira abalala nga batyagiwalira mu nsimbi Kyokka bo nebafunako wadde ennusu.

Omubaka mu Palamenti akiikirira abaana bonna mu ggwanga Anna Adeke ajeemedde ekiragiro kya Sipiika wa Palamenti Rebecca Alitwala Kadaga bweyalagidde ababaka okwewala okwogera ku nsonga ezikwatagana n’ebbago ery’etteeka ly’ekkomo ku myaka egy’obukulu omuntu gyakomako okukulembera eggwanga 75.

Omukubiriza w’olukiiko olukulu olw’eggwanga Kadaga yagambye nti abantu emitima gibeewanikira bwereere kubanga ebbago eryo terinnakubwako kimunye mu Palamenti n’olwekyo abantu baalibadde ku  bintu ebirala.

Wabula okwawukana ku ebyo,  Adeke akubye olukungaana lwa bannamawulire ku Palamenti ng’ayogera ku nsonga yeemu n’agamba nti  ye akyogerako ng’omukulembeze w’abavubuka .

Police mu Disitulikiti y’e Amuru ekonkomadde n’abaana mwenda abagisuuliddwa omukazi Grace Akwero ow’emyaka 35 omutuuze ku kyalo Pagora ekisangibwa mu muluka gw’e Pupwonya ng’abaana bano yabasudde ku Police Post ye Atiak ku lwomukaaga lwa ssabbiiti ewedde.

Kigambibwa nti Akwero yasooka kuleeta musango ku Police ng’awaabira bba Santo Acaye  okwesuulirayo ogwa nnaggamba nga takyalabirira baana nabwekityo kwekusalawo aleete abaana ku Police kubanga kitaabwe yabasuulawo nga n’ekyokulya baakifuuwa mu mmindi.

Patrick Jimmy Okema, ayogerera Police mu bitundu by’e Aswa River  akakasizza bino era n’agamba nti abaana abasatu bamaze okutwalibwa ekitongole ekiyamba abaana mu kitundu ekyo. 
 

Omubaka wa Pulezidenti mu ssaza ly’e Buweeekula , Maj. Joseph Kakooza akunze banna Buweekula n’abatu b’e Mubende okuvaayo okutandika okulaga obukambwe ku bannannyini ttaka abagufudde omugano okubagobaganya ku ttaka e Mubende.

Kakooza agamba nti singa abatuuze tebavaayo kutandika kulwanyisa bagagga ababagoba ku ttaka, abantu batandise okufuuka abagwira wano mu nsi yaabwe. 

Ono okwogera bino abadde asisinkanye abatuuze abasukka mu 4000 abagobwa ku ttaka okuva ku byalo nga abasisinkanye  ku kyalo Nakaladde ekisangibwa mu muluka gw’e Kabulamuliro ne Kasambya mu ggombolola y’e Madudu mu Disitulikiti Mubende

Robert Kyagulanyi Ssentamu aka Bobi Wine omukulembeze  wa Ghetto, mu ttuntu lya leero alayiziddwa nga omubaka wa Kyaddondo ey’obuvanjuba .

Kyagulanyi Ssentamu alayiziddwa Clerk wa Palamenti Jane Kibirige, n’alayira okukuuma ssemateeka w’eggwanga n’okussa ekitiibwa mu mateeka agafuga Palamenti.

Sipiika wa Palamenti Rebecca Alitwala Kadaga ayanirizza Kyagulanyi mu Palamenti ey’ekkumi n’amuwa kkopi ya ssemateeka w’eggwanga ne kkopi y’amateeka agafuga Palamenti.